Si Lazaro

MARSO 29, 2020: IKALIMANG DOMINGGO SA KWARESMA

Mga Pagbasa: Ez. 37;12-14/Sal. 130/Rom. 8;8-11/Jn. 11;1-45

Ang Betaniya nagkahulogan man og dapit sa mga kabus kun house of the Poor. Dinhi nagpuyo ang mga managsuon nga sila si Maria, Marta, ug Lazaro. Suod sila nga mga higala ni Jesus. Ug normally si Jesus mohapit gyud didto sa mga higayon nga siya mopanaw. Adunay sakit nga panghitabo alang sa maong banay. Ang ilang igsuon nga si Lazaro namatay. Nasayud na siya niini sa dihang giingnan siya nga namatay ang iyang suod nga higala apan nagpadugay dugay pa siya.

Mga upat na ka adlaw human mamatay si Lazaro anha pa siya niadto aron paghupay sa ilang kaguol. Nganong upat pa ka adlaw? Aron maseguro nga patay na gyud ang maong tawo. Kini tungod kay kaniadto wala pa man mauso alang kanila ang embalsamar dili sama sa mga Ehiptohanon nga dunay mummification. Gibanhaw niya si Lazaro ug daghan kaniya mituo.

Tulukibon ang gibuhiang mga pulong ni Marta: “Kun dinhi ka pa lamang Ginoo, dili unta mamatay ang akong Igsuon!” kun ato kining gi apply sa atong kasinatian karon tibuok kalibutan: “Kun dinhi ka pa lamang Ginoo dili unta mas modaghan pa ang patay tungod ning coronavirus!”

Sa dihang gihimo ni Papa Francisco niadtong Marso 28, 2020 ala una sa kaadlawon (sa atong oras dinhi sa PIlipinas) ang Urbi et Orbi nga gihimo sa paagi nga extraordinary, tungod sa mga sirkumstansiya nga sama niini, akong nakita nga hawan kaayo walay igong kisaw. Apan ang mensahe puno sa paglaum. Gipahimug-atan: “Ayaw kahadlok! Pagtuo! Sama sa mga tinun-an nga nipukaw kang Jesus samtang siya natulog didto sa may ulin sa ilang sakayan, gipukaw siya tungod kay hapit na sila malunod! Nilurang ang hangin ug nibanos ang kalinaw human sa unos! Gipangutana niya ang iyang mga tinun-an: “Asa man ang inyong pagtuo!” dako og kadaut ang coronavirus! Iyang gihikaw ang atong katungod sa paghikap ug paggakos sa matag usa kanato. Iyang giguba ang matag relasyon. Daghang kinabuhi ang nakalas! Daghang mga tawo ang napagan.

Wa tuyoa nga ning mga panahona karon nahimo ra akong emosyonal. Sa matag higayon nga bendisyonan ko ang akong mga parokyano dunay mga  higyaon nga bation ko ang tumang kasakit tungod kaha sa daghang mga pangutana apil na pud ang pagmahay kun nganong angayan kining mahitabo. Matud pa nila angayang paninglon ang nagpasiugda ning tanan. Dunay miingon nga silot kini sa Dios? Ambot lang basin minugna ra pud og tawo.

Dunay mga higayon nga ang Dios dili makahatag og tubag sa atong mga pangutana apan usa lang ka butang ang seguro kuyog siya kanato ning mga panahona.  Daghan ag mga Lazaro nga nabiktima ug napukan apan maoy timan-an nato nga dunay Dios nga kanila ug kanato mopabangon gikan sa atong pagkapukan.