EDITORYAL - Band-aide solution ra

Usa ka maayong pamaagi batok sa pagkatap pa sa COVID-19 ang pagpatuman og quarantine, lockdowns ug uban pang matang sa aksyon sa gobiyerno nga magdili sa publiko nga magtapok-tapok o mga kalihokan sa daghang mga tawo gawas sa panimalay.

Apan temporaryo lang kini nga pamaagi aron lang pahinayon ang pagtinakdanay sa mga tawo. Gihimo kini samtang wala pay nakitang mas epektibong medisina aron makublan ang mga tawo gikan niini.

Dili kini tambal o bakuna kondili pagpagamay lang sa tsansang duna pay madugang sa mga una nang natakboyan. Sa laktod, band-aide solution ra.

Maong samtang wala pay tambal ug bakuna, kinahanglang tumanon sa katawhan ang mga gipatumang protocols sa gobiyerno kay posibleng dunay mga wala masayod nga nataptan na niini nga naglaroy-laroy pa sa kadalanan.

Apan kinahanglang pangusgan pa sa gobiyerno ang pagpangita niadtong mga nakahimamat o nasagol sa mga nagpositibo sa COVID-19 kay sila siguradong manakod gyud sa uban, kinahanglan silang mabuwag sa publiko ug maatiman dayon sa tambalanan.

Sa katawhan, wagtangon unta kining taras nga hinambugero ug kinaiyang mangamong sa uban nga nagtinarong.

Duna gyuy mga tawong ang kinaiya kusog manaway ug sukdon ang gobiyerno.

Apan kun matakdan na, adto mangayo og tabang sa gobiyerno kay way kwartang ikapatambal ug gusto pa diay silang maluwas ug mabuhi.

Mabasa naman pinaagi sa internet ang mga kinahanglang masayran bahin sa maong virus, ang kinahanglan lang mao ang pagpili sa tukmang impormasyon kun asa kini gikan ug sundon ang mga pahimangno ug patakarang gipatuman.

Dili kini paglisudlisod sa katawhan kondili para sa kaayohan sa tanan.

Kaayohan ilabi na sa mga kabus nga way ikasarang aron magpatambal kun magkasakit-sakit na ang tibuok pamilya.