Wa gamita ang utok

Para nako, dili gyud tukma ang mando sa kadagkoan sa Department of Transportation (DOTr) nga did-an ang pagpaangkas sa motorsiklo, bisan og ang pamilya sa driver.

Nagsalig ra gyud ning mga tawhana kay wa man tingali makasuway nga ang sakop sa ilang pamilya mosakay og motorsiklo aron pag-adto sa ilang trabahoan o bisan asa nga ilang adtoan.

Nahulog ra og kataw-anan ang giingon sa mga opisyal sa DOTr nga ang ilang gihimo kabahin sa “social distancing” aron malikayan ang Coronavirus Disease.

Dili ko moreklamo kon pangdakpon ang mga magpasakay og laing tawo nga dili pamilya sa driver, apan kon asawa ug mga anak ang moangkas, sus, nganong kinahanglan pa man ang social distancing?

Wa ba masulod sa inyong mga utok nga ang mga sakop sa pamilya mogakos pa man gani matag karon ug unya sa ilang amahan, inahan ug mga anak? Wa ba kana mahitabo kaninyo taga DOTr?

Maisip gyud nga “overacting” ang mga opisyal sa DOTr, labi na kadtong tulo ka Undersecretaries nga matud pa nanawag kang LTO-7 Regional Director Vic Caindec ug mikuwestyon nganong gitugotan ra unta ang mga sakop sa pamilya nga makaangkas sa motor sa ilang bana, papa ug mga igsuon.

Unya, nganong wa may gihimo niini si Mike Dino, ang presidential assistant for Visayas? Sigurado ko nga maminaw kaniya si Presidente Duterte ingon man si Senador Bong Go kon iyang gipadangat kining isyuha agi og pagtabang sa mga pobre.

Apan may higayon pa nga si Dino makahimo og tabang niini. Kinahanglan nga iyang pasabton si Presidente Duterte niining isyuha. Ngano gud tawon nga mahadlok man ang DOTr nga makaangkas sa motor ang mga sakop sa pamilya?

Angay usab nga si Mayor Edgar Labella, isip presidente sa League of City Mayors of the Philippines, mangusog gyud niining isyuha ug mo-lobby sa presidente aron katugotan ra ang usa ka sakop sa pamilya nga makaangkas sa motorsiklo.

Nakasabot ko ni Caindec nga gusto gyud unta siya nga motabang apan gilupig siya kay mas dagko niya’g ranggo ang mga nanawag kaniya ug mimando nga di gyud tugotan nga makaangkas sa motosiklo bisan ang mga sakop sa pamilya.

* * *

Unya laing kahasol nga mahimo sa mga opisyal sa LTO mao nga kay sirado man ang ilang opisina karon, nagpasabot nga kon madakpan ka ug maisyohan og TOP matanggong ang imong lisensya ug dili ka na maka-drive human sa tulo ka adlaw.

Matud ni Caindec nga dili usab mahimo nga dili sila manakop.

Diay akong sugyot, nganong dili man lang kamo mobukas sa inyong opisina ug limitihan ra ang mga tawo nga mosulod aron pagtuman sa “social distancing?”

Pananglit 20 ra ang pasudlon, ug kon mogawas na ang duha, pasudlan na usab og duha, dili ba maayo? Bi, hunahunaa kuno ninyo og maayo.