Ang kahulogan sa LDR

Tungod ning atong kahimtang karon daw nahisama kita sa mga manag-uyab o managtiayon nga nakasinati og Long Distance Relationship. Hinuon dunay laing kahulogan usab ang LDR.

Ila kining gihatagan og kahulogan nga nagkanayon: “Layo sa akong Kamot, Duol sa Akong Heart, Ready Maghuwat!”Kun ato kining I apply sa paagi nga gisaulog nato ang Santos nga Misa karong mga panahona:

Layo sa akong Kamot. Sa dihang wala pa moabot ang Segundo Vaticano nga Konsilyo ang mga mangalawat kaniadto kinahanglang moluhod ug bugtong sa dila lamang dawaton ang Lawas sa atong Ginoo.  Sa dihang nahitabo ang mga liturgical reforms mahimo nang dawaton sa palad o kamot bisan pa man kun anaa ang dakong posibilidad sa abuso. Nahinumdom ko nga dunay diyosesis nga nipahunong niini tungod kay ang maong balansayon gihimong kahimanan sa mga sabungero aron dunay mahungit nga hostiyas ngadto sa ilang mga manok.

Duol sa Akong Heart. Ginaingon nga ang gilay-on o gidul-on mao ang sukaranan nga makaingon kitang suod sa usa ka tawo o butang.

Mahimong absent ang bisan unsang aspetong pisikal apan ang diwa ug pagbati padayong duol sa mga hingtungdan.

Dunay nagkanayon kanako nga ning hitaboa karon, ilang nasinati nga daw sa naglaway na lang silang mokalawat sa matag higayon nga pagahimoon ang mga on line masses.

Kahaw-ang ang ilang gibati. Apan bisan pa man niini nahimong makahuloganon lang sa gihapon ang maong hitabo kay the more nga dili nato mahikap ang ostiyas diha sa pagkalawat the more ang atong mga kasingkasing nga mangandoy niini.

Atong nasinati ang maong dakong panginahanglan. Pahinumdom kini nga kun mamahimong hapsay na ang tanan, unta dili nato ibalewala ang atong gikalawat. Dili siya pakapin hinunoa, ato siyang kinabuhi.

Ready Maghuwat. Matud pa, Patience is a Virtue. Anhi masukod ang atong kahamtong kun ugaling maantigo na kitang mopaabot uban ang dakong paglaum nga mamahimong saulogon nato ingon sa naandan ang butang nga gihikaw kanato sa kasamtangan.

Hustong paghunahuna ug dili nato tugotan ang bisan unsang kapintas nga mohari sa atong kagalamhan nga tungod niini atong himoong mohari ang kahakog ug kawalay kapaingnan. Ug inig kahuman niini asa man kita padulong?

Kun ang tawhanong kalantip di makatugkad ang Diosnong kinaadman makahatag sa tubag.

Ang tubag nga mahatag sa Dios ning panahon sa kalisdanan mao nga dili kita niya biyaan sa pagka karon. Nag-antos man tuod kita apan kuyog ang Dios sa atong pag-antos karon.