Panagang sa Covid-19 ug kagutom

Bisan o tungod ba kaha sa kahanap sa mga lagda sa nasudnong gobyerno pagpatuman sa community quarantine sa nagkalainlaing bahin sa nasud, nisidlak ang bituon sa lokal nga mga opisyal nga nipasiugda og mapuslanong mga lakang pagpanalipod sa ilang mga molupyo di lang gikan sa Covid-19 kon dili hasta na sab sa kagutom tungod sa nahunong nga mga trabaho ug mga patigayon.

Kasagaran nila nagsugod sa mga programa batok sa Covid-19 bisan wa pa ideklarar ang community quarantine sa Metro Manila ug dayon ang enhanced community quarantine sa tibuok Luzon.

* * *

Nag-una sa listahan si Mayor Vico Sotto sa Pasig City tungod sa mosunod niyang mga lakang:

Pagpalupad og disinfecting drones sa mga barangay ug pagtukod og sanitation tents sa nataran sa City Hall ug mga tambalanan;

Pag-awhag sa mga molupyo pagpahuwam sa ilang mga bisikleta aron masakyan sa health workers gikan ug padung sa kabalayan ug tambalanan; ug

Pagpakatap og mobile kitchens ug pag-apud-apod og tag-P400 nga food packs sa mga nawad-an og panginabuhi.

* * *

Ubang naapil sa listahan:

Mayor Kit Nieto sa Cainta nanglibre sa bakuna batok pneumonia sa senior citizens ug gatas sa mga masuso ug food stubs sa gipanggutom nga mga molupyo;

Mayor Isko Moreno sa Manila nitukod og infectious disease control center uban ang isolation rooms nga may aircon ug banyo ug nipagamit sa bakanteng hotels alang sa health workers;

Mayor Marcy Teodoro sa Marikina nagpatukod og P2.7 milyones nga molecular biology laboratory nga molaslas sa gasto sa matag Covid-19 test ngadto sa P1,700 inay P8,000 sa pribadong ospital;

* * *

Mayor Rex Gatchalian sa Valenzuela nilusad sa automated contact tracing software sa mas paspas nga pagsubay sa posibleng natakdan sa pasyente sa Covid-19 ug nanghatag og tag-P700 nga grocery vouchers sa 75,000 ka kabos nga pamilya;

Mayor Abby Binay sa Makati nanghatag og P2,000 nga cash assistance sa 6,000 ka tricycle drivers ug food packs sa 80,000 ka tinun-an;

Mayor Joy Belmonte sa Quezon City nanghatag og inadlawng food packs sa 400,000 ka pamilya; ug

Mayor Edgar Labella sa Cebu City nga manghatag og 100,000 ka sakong bugas humay sa mga barangay.  [email protected]