EDITORYAL - Solusyon naa sa publiko

Walay laing makapakgang sa pagkatap aning sakit nga novel coronavirus (COVID-19) kondili ang kooperasyon ra gyud sa publiko sa mga kamandoang gipatuman sa gobiyerno. Nag-una niini mao ra gyud ang social distancing o ang pagpalayo gikan sa usa’g usa nga usahay imposibleng masunod ilabi na kun magsakay og jeep de pasaheroan.

Apan may solusyon niini, dakpon ang mga drayber nga mamugos pagpasikit sa iyang mga pasahero, samtang walay balaod sila nalapas pagpasakay subay sa kapasidad sa ilang sakyanan, apan dili karon ordinaryong panahon.

Mahimo silang sagpaon og kaso sama sa disobedience to persons of authority ilabi na nga dunay proklamasyon ang Presidente nga ipaubos sa public health emergency ang tibuok nasud tungod sa COVID-19 pandemic.

Gibutang sa risgo sa drayber ang kinabuhi sa mga tawo para lang sa iyang kaugalingong interes.  Ang social distancing nga gipatuman wala man matuman mao nga miabot sa punto nga mas gipahugtan ang implimentasyon niini pinaagi sa pag-quarantine sa mga tawo o sa lugar.

Mao usab unta kini ang isipon sa matag usa ka Pilipino. Kun magpasagad sa gawas sa balay ug wala mag-amping bisan nalang pagpalayo sa mga katabi o mga kauban dako kaayo ang tsansang matakdan sila kun may usa kanila nga carrier sa maong virus.

Kun way mapasahan sa virus, magpabilin ra kini ug mawagtang sa tawong natakdan kun maatiman dayon sila sa mga tambalanan.

Sama ra nga gibutang nato sa peligro ang kinabuhi sa tanan natong mahal sa kinabuhi  sa atong balay, kay siguro man gyud nga mopauli man ta sa ato.

Ang gobiyerno walay mahimo kun ang mga tawo magmagahi ug dili motuman sa mga lagda. Alaot ang kinabag-ang nagtuman busa makiangayon lang nga dakpon kadtong mga tawong dili mosunod sa quarantine rules. Ang pag-quarantine sa usa ka lugar sama sa gihimo karon sa tibuok Luzon, usa lamang ka pamaagi aron mohinay ang pagpasapasa sa mga tawo sa maong virus, apan ang kalamposan niini naa sa tagsa-tagsa ka mga tawo.