Misa suspendido tungod sa corona

Sugod karong adlaw, Marso 18 suspendido na ang misa sa tanang simbahan sa Archdiocese of Cebu isip prevention sa pagkatap sa coronavirus disease.

Lakip sa gipakanselar ang mga kalihokan sa umaabot semana santa nga naglangkob sa prosisyon ug uban pa nga adunay daghan nga mga tawo.

Gipahibawo kini ni Archbishop Jose Palma atol sa presscon kagahapon kauban ang mga pari sa archdiocese ug mga medical experts nga gokonsulta usab sa lakang nga gipatuman karon sa simbahan.

Matud sa arsobispo nga dili sayon ang nakab-ot nga desisyon sanglit mao man kini ang tulomanon isip mga magtotoo.

Apan gihimug-atan niya ang kaluwasan sa mga tawo nga peligrong matakdan sa virus tungod sa kadaghan sa mga tawo.

Giklaro sa opisyal sa simbahan nga dili sirad-an ang simbahan diin makasulod ug mag ampo ang mga tawo.

Dunay misa nga i live stream sa social media ug sa mga telebisyon nga maoy giawhag nga himoon.

Ang mga kasal ug bunyag gipauswag usab hangtod mawagtang na kining problema sa coronavirus.

Ang misa sa patay himoon gihapon apan immediate family members lang o dili daghang mga tawo ang motambong.

Ingon niini protocol karon sa Simbahang Katoliko sa Sugbo nga nakasamad sa dughan sa mga magtotoo.

Tumong niini nga mabuntog ang kagaw pero murag initial victory kini sa covid kay nahimo niining naparalisar ang highest form of prayer nga mao ang misa.

Manghinaut nalang kita nga mabuntog ang kontra nga coronavirus aron mabalik na sa normal ang atong kinabuhi.

Dako kining pahigmata kanato nga hatagan og importansya ang simbahan, dinhi nato makita ang pagbalewala nato sa misa kaniadto nga karon dili una nato masinati.

Tinuod gyud ang giingon nga makita nimo ang bili sa butang kon wala na.