Pagdani sa lokal nga turista

Dili na mapugngan ang dakong pagkahagba sa industriya sa turismo sa Pilipinas tungod niining kalibotanong pagkuyanap sa Coronavirus Disease o COVID-19. Ug gitagna sa sunod nga mga bulan o tuig nato masinati ang mas seryoso nga epekto sa maong balatian. Mirangkada na unta paglambo ang industriya sa turismo sa nasud sa dihang midani na kinig miliyones ka langyaw’ng turista suod na sa pipila ka tuig. Nahimong alternatibong destinayon ang nasud tungod kay lagi daghan nang foreign tourists ang napul-an pagbisita sa Thailand, Indonesia ug uban pa. Apan niining grabe nga pagsakdap sa coronavirus sa halos usa ka gatus ka nasud, wala pasayloa hasta ang Pilipinas. Gani misaka na ang gidakhanon sa nitakboyan sa maong sakit dinhi sa nasud, matud pa sa Departrment of Health. Siguro panahon na nga mohimo og solusyon ang kagamhanan kabahin sa problema sa pagkahugno sa industriya sa turismo. Ug kini may kalabotan sa pagpalig-on sa kampanya pagdani mismo sa mga lokal nga turista.

Buot nako nga ipasabot nga angay nga pakusgan ang promosyon nga alang mismo sa mga lokal nga turista pagbisita sa mga tourist destinations gikan sa Luzon padulhog sa Mindanao. Kini aron nga dili usab sila mairihis sa mga lugar sa ilang kaugalingong nasud. Ang problema sa atong industriya sa turismo mao nga mas naka-concentrate ang atong mga opisyal sa maong sektor paghakot og mga langyaw’ng turista. Kini gumikan lagi kay mas dako ang income tungod kay dolyares.

Usa sa rason ngano nga lisod usab alang sa mga lokal nga turisma pagbisita sa atong mga tourist destination mao ang kamahal pagbisita niining mga lugara. Tiaw mo nang mas gusto pa sa atong mga kababayan mga molopad padulong Hong Kong, Singapore ug Japan tungod sa mga promo.

Usa sa mga problema niini mao ang accessibility sa atong mga local tourist destinations. Talagsa ray mga airlines companies mosugal paglupad og direct flight niadtong mga tourist areas nga tan-aw nila malugi ang ilang operasyon.

Mismong si Presidente Rodrigo Duterte ang miingganyo sa mga Pilipino pagbisita sa mga maanindot nga lugar sa Pilipinas. Hinuon dili lamang ang mga ordinaryong turista ang angay mosanong sa panawagan sa president.

Angay usab nga mohimo og promosyon ang mga tourism stakeholders ngadto sa mga local tourist aron nga madani sila pag-patronize sa atong kaugalingong natural nga bahandi.