Mga buhat sa kaluoy

Giawhag kita sa atong tinuohan nga mohimo gyud kita og mga buhat sa kaluoy panahon sa kwaresma. Apan dili lang panahon sa kwaresma hasta na tingali sa tanang mga adlaw tungod kay kini mao ang atong tulomanon.

Ato gyud kining himoon tungod  kay kini man ang atong tawag ingon nga tawo. Matud pa dunay duha ka mga matang sa buhat sa kalooy. Naglangkob kini sa:

1. Coroporal Works of Mercy nga naglangkob sa paghimo og maayo ngadto sa uban diha sa paghatag tingali sa ilang mga panginahanglang materyal sama sa paghatag og limos, pagduaw sa mga masakiton ug uban pa.

2. Spiritual Works of Mercy nga naglambigit sa pag-ampo sa mga kaigsuonan natong nihalin na ngadto sa laing kalibutan o dili ba kaha ang paghimo og mga sakripisyo alang sa pagkakabig sa mga makasasala.

Gani ato pa gyud kining pakapinan pa og sakripisyo aron sa ingon mamahimong mas makahuloganon ang gihimo natong pagtabang.

Kabahin na niini ang pagpuasa nga sa ato pa ang pagdumili sa pagkaon dili tungod kay atong tagoan ang atong makaon aron kaonon sa laing hugna kondili ang budget nga alang gyud unta nato atong gamiton aron makatabang sa uban nga mas nagkinahanglan pa kay kanato.

Dini na mosulod ang kahulogan sa gugma diha sa konteksto sa pagsakripisyo. Kay ang sakripisyo nga hawa sa gugma mahimo mang sabton nato ingon nga silot.

Dinhi sa Pilipinas nahimong sikat ang kadaghanan kanato labina kun maghisgot na kita og semana santa. Kini tungod kay daghang mga tawo ang mangangkong mohimo dayon og sakrispisyo, seasonal nga pagkamanggihatagon, visita iglesia ug uban pa.

Gani ang uban kanila mo-post man sa ilang tagsa tagasa ka mga FB Accounts sa mga happenings sa ilang kinabuhi nianang mga adlawa.

Buot nilang imantala ang Good News ngadto sa uban. Hinuon ako, dili kaayo ko hilig niana.

Ang paghimo og maayo corporal man o spiritual dili lang reflection sa atong pagkatawo o sa bisan unsa nga anaa sa atong kasingkasing.

Hinunoa ang maong buhat gihimo nato kay mao man ang husto ug makiangayon. May modayeg  man o wala ang mahinungdanon nakahimo kita sa bisan unsa nga gipaabot gikan kanato.