Samad sa dughan sa mga kapitan

Sa panigurado nga mapaabot gyud sa grass roots o sa katawhan ang serbisyo, magbutang si Mayor Edgardo Labella niining gitawag og  Mayor Information Liaison Office o MILO sa mga barangay sa dakbayan sa Sugbo.

Lahi kini sa BMO ni kanhi Mayor Tomas Osmeña tungod kay dili lang kadtong mga alyado sa city hall kondili tanang barangay butangan og MILO.

Sa ka manggiikogon sa mayor misuwat ug mihangyo pa siya sa mga kapitan nga hatagan og luna ang MILO sa ilang barangay, ingon niini ka humble ang mayor nga mohangyo pa nga pwede ra man unta niya mandoan ang barangay.

Bitaw at least mapakita gihapon niya ang tatak Edgardo Labella nga mapaubsanon ug dili hambugero.

Apan ang pagbutang sa mayor sa MILO sa kabarangayan dunay bentaha ug naa usay disbentaha.

Dili lang ma monopolya sa mga barangay officials ang pagserbisyo sa mga tawo kay naa namay alternatibo nga kaadtohan kay kun ma busy ang kapitan tungod sa daghang giatiman mamahimo nang moadto sa MILO kinsa pwede pud kuhiton sa kapitan nga ipaabot sa mayor ang mga gihangyo sa katawhan.

Pero sa tan-aw nako ani murag makamugna kini og negatibong epekto sa liderato sa mayor.

Imbes makamugna og kahiusahan ang iyang tumong mas makamugna kini hilom nga panagbahinbahin.

Kung ang usa ka kapitan nga butangan og MILO sa iyang barangay siyempre maapektohan gyud ang garbo bisan unsa pa ka loyal sa mayor mahiubos gyud.

Masamaran ang garbo niini nga mamahimong mitsa sa paghunahuna niini nga haum pa ba siya isip lider sa barangay.

Kung ang garbo na gani ang matandog murag lisod gyud pahiulian tungod kay ang pagkatawo man ang nakataya niini.

Sa barangay ang mga opisyal ang tinamod ug tinahod apan sa bag ong sistema murag makwestyon na hinoon ang ilang katakos.

Maayo man ang tumong sa mayor sa pagumol og MILO apan posibleng magamit sa iyang mga kaatbang ang opportunity nga makabig ang pagbali sa simpatiya sa umaabot.

Maayo lagi og dili na molansad si Labella kay wala siyay angayan kabalak-an apan kun ganahan siya nga magpabilin sa serbisyo dili niya samaran ang garbo sa mga amahan sa barangay nga iyang kaalyado.

Sa atubangan magyanguyango ra na ang mga kapitan sa gusto sa mayor bisan gadugo ang dugban apan basin inig abot sa sunod eleksyon modugo na ang nasamad nga kasingkasing nga dili na hinoon maalim nga mosangpot sa mga kaatbang nga mogamit sa isyu alang sa ilang vested interest.