Matag adlaw magtukaw

Wala pa gani ang ting-init sunodsunod na ang mga sunog dinhi sa Metro Cebu sa niaging mga semana. Gani nikalas gayud og mga kinabuhi ug gatusan ka pamilya ang nawad-ang sa ilang pinuy-anan sa maong mga insidente.

Nahibalo na kita nga dili gayud moila og panahon ang sunog. Bisan pa sa mga bulan nga ting-ulan, dili kalikayan nga motumaw kining maong insidente ug molamoy ug daghang kabtangan, ilabina sa mga lugar nga naghuot ang kabalayan.

Mao nang gikinahanglan kaayo ang pagmatngon sa matag sakop sa panimalay aron malikayan ang sunog. Kay lagi mora kini og kawatan nga mobutho sa bisan unsa nga oras, wala gyuy kumo sa kanunay nga alerto.

Hinuon dili lamang ang matag sakop sa panimaly ang angay magmaigmat batok sa maong insidente. Importante kaayo nga ang matag panimalay tibuok komunidad magtinabangay aron nga malikayan ang sunog.

Ang usa ka komunidad nga kanunay alerto adunay dakong purohan nga mahilayo kini sa kalamidad. Gani ang pagtinabangay sulod sa barangay dako kaayo og ikatabang batok sa unsa mang krimen.

Apan, bisan pa sa mga pasidaan sa otoridad kalabot sa kanunay nga pag-amping batok sa sunog, dili gayud kalikayan nga motumaw kining maong klase sa insidente. Kini tungod usab sa kahuyang usahay sa atong panagang.

Karong bulana, panahon pagsugod sa ting-init, mag-obserbar na usab ang nasud sa tinuig nga Fire Prevention Month. Ug kugi na usab ang otoridad, ilabina ang Bureau of Fire Protection, pagpahimangno sa katawhan batok sa insidente sa sunog.

Uso na usab ang mga inspeksiyon pagtino kun unsa ka andam ang mga business establishment ug mga panimalay kun motumaw ang sunog. Dili lamang kana, adunay mga fire drill ug ubang disaster training nga kasagarang ipahigayon sa otoridad aron pag-edukar sa komunidad kabahin sa mga sunog ug ubang katalagman. Apan bisan pa man niini, morag dili magsilbi ang mga pahimangno sa kagamhaman ngadto sa katawhan sa pagmatngon batok sa sunog. Gani, sa Fire Prevention Month mosungog ang mga insidente sa sunog tungod lagi kay minos kita sa pagpakabana sa ka importante sa kanunay nga pagmatngon mahitungod niini.

Mao na nga kinahanglan dili lamang matag Marso kita mahunumdom sa ka importante sa pagpangandam sa sunog. Angay nato hunahunaon nga matag adlaw kita magtukaw batok sa maong klase sa kalamidad.