Pay it forward

Sa YouTube natandog ako sa akong nakita diin ang amahan ug anak nga nipalit unta og birthday cake alang sa apohan nga nagsaulog sa iyang adlaw nga natawhan niadtong higayona.

Apan ang problema mao nga kuwang gyud ang ilang kwarta. Wala gyud nila mapalit ang paboritong cake ni Lolo.

Nilakaw sila nga huyhoy kaayo ang abaga ug bug-at kaayo ang pamati. Talukahaw lang dunay tawo nga niapas kanila og nagdala sa cake nga takus makapalipay sa tiguwang.

Gidala kini sa usa ka tawo nga niasoy pud sa iyang kagahapon. Nga niadtong bata pa siya malisud alang kanila ang pagpalit og pagkaon hangtud nga dunay tawo nga nihatag kanila og pagkaon apan dunay gihatag nga note diin nasulat kining mosunod:

“Pay it Forward!” gidala kini sa amahan ug anak uban ang dakong kalipay ngadto sa tiguwang. Tuod man nakahilak sa kalipay ang maong tiguwang.

Apan nangutana kini kun diin gikan ang maong paboritong cake ug unsay kapuslanan sa iyang kinabuhi. Gisaysay sa iyang anak ang nahitabo ug gipakita niya kini sa card nga dunay napatik nga pay it forward.

Busa nahimuot ang tiguwang kay siya diay mismo ang naghatag niini sa maong tawo niadtong dugay na nga panahon.

Ang maong talan-awon nipahinumdom kanako sa dakong bili sa paghimo og maayo nga dili na mangayo pa og bawos.

Hinunoa ang pagdasig sa gihimoan og maayo nga mohimo pud og  maayo alang sa uban. Kining maong sugilanon usab nabuhatan man og salida kaniadto nga Pay It Forward pud ang Title.

Ang maong video nipahinumdom kanako sa mga tawo nga nahimong manggihatagon kaayo alang kanako.

Una na niini ang akong apohan nga si Lola Delfina nga usa ka higayon niana nakabuak ko og itlog kay gusto kong magluto og itlog niadtong bata pa ako.

Napusgay gyud kini apan imbis siya masuko iyang gipupho ang maong buak nga itlog ug gisulod sa plastic iya kong gilutoan og laing itlog. Ingon ana ko ka pinangga sa akong apohan.

Mao tingali nga magsakit ko kun dili ko makatapad niya pagkatulog samtang ang akong apohang lalaki nga si Florentino Sr. Tua man matulog sa pikas lantay. Hinuon kadtong akong Lola Delfina ang di sab gyud tihik mobutang og sili sa akong baba kun makasulti ko og maayo.

Mao nga niadtong panahona disiplinado  kaayo to siya. Bisan di ko ganahan moadto simbahan iya gyud kong dad-on aron paapilon anang ilang prayer meeting.

Mao ni ang hinungdan kun nganong napari ko karon. Salamat ko nila nga maoy nitisok sa binhi sa pagkamanggihatagon.

Mao nga hangtud karon naningkamot kong mohimo og maayo taliwala sa akong pagkamasalaypon. Mahinumdoman man o dili nan, dili na kini mahinungdanon.