EDITORYAL - Modernong mass transport

Manirado na ang planta sa usa sa mga inilang kompanya sa sakyanan nga mao ang Honda Cars Philippines Inc. nga nagbase sa Sta. Rosa Laguna sugod karong bulan sa Marso, dul-an 400 ka mga empleyado nga direktang nagtrabaho sa maong planta ang maapektahan.

Ang eksplinasyon sa maong kompanya, kabahin kini sa gitawag nila og “optimization efforts in the production operations in Asia and Oceania region.”

Walay makabuot kun gusto kining buhaton ni bisan kinsang kompanya, apan makapahibulong kun unsay rason nga unta daghan naman ang mga tawo karong makapalit og sakyanan.

Ang Honda brand naila na kaayo sa Pilipinas mao nga ang pagsira niini dinhi dunay mas lawom nga hinungdan.

Matud sa report sa Philstar.com, sukad gipatas-an ang buhis sa sakyanan niadtong 2018 nitibugsok og 16 porsiyento ang halin niini base sa report Chamber of Automotive Manufacturers of the Philippines, Inc. and the Truck Manufacturers Association.

Apan lahi ang pangagpas sa tigpamaba sa Malacañang Salvador  Panelo di ang buhis ang hinungdan kondili nihinay gyud ang halin sa maong kompanya.

Dili ikalimod daghan na kaayo karong mga kompanya nga nagtanyag og baratong brand new nga sakyanan ug daghang payment schemes nga makapagaan sa bulsa sa pumapalit. Nagtuo sab siyang dili ang pagsaka sa buhis sa mga sakyanan sugod niadtong Enero 2018 ang rason.

Unsa may implikasyon niini sa ekonomiya sa nasud, dili kaayo dako. Hinuon luoy kadtong mawagtangan og trabaho nga direktang empleyado sa maong kompanya ug kinahanglang tabangan sila sa gobiyerno.

Dili man sab kini makapamenus sa gidaghanon sa mga sakyanan diha sa kadalanan tungod kay bisan manirado kini, dunay daghang kompanya nga barato og sakyanan. Way alibyo sa trapiko niining bahina.

Mas maayo pang paspasan sa gobiyerno kining gisaad nilang mga moderno ug epektibong mass transport system sa nasud kay haron di na mapugos ang mga tawo pagpalit og mga sakyanan nga dugangdugang lang sa trapiko.