Espenido gipiit, dangatan misidlit

Misiyok ang dalunggan sa katawhan dihang mibuto ang makabungog nga balita: “Police Lt. Col. Jovie Espenido apil sa 357 ka polis nga anaa sa Drugs List ni Presidente Duterte.”

Daghang nakurat. Daghan ang dili gustong motuo. Lakip na mismo si Duterte. Nganong mahiapil man intawon si Espenido nga gikahadlokan man gani siya sa mga drug lords, unya sa usa lamang ka pamilok, siya nahilambigit? Makalibog!

Kadto lang iyang pagpayhag sa gikaintapang illegal drug syndicate sa Mindanao nga dugay nang gihawakan sa mga Parojinog ug niadtong pagkasikop-bilanggo ni anhing Albuera, Leyte Mayor Rolando Espinosa, kinsa gipasanginlang nalambigit sab sa ilegal nga drugas, mga ebedinsiya kining magmatuod nga kaaway gyud ni Espinido ang pagpakig-abin sa dulang illegal drugs.

Gani, si Jovie, sama ni Senador Manny Pacquiao relihiyoso sab. Kugihan mobasa’g Bibliya, diin kutob sa unsay pagtulon-an nga nakuha, giaplay-sunod gyod sa matag adlaw niyang pagpangalagad. Unya, tuboan na hinuog sungay iyang agtang? Imposible!

Hinuon, base sa iyang pamahayag sa interbiyu atubangan ni DYHP manager, Atty. Ruphil Bañoc, siya mipabuhagay: “Kini ang akong statement. Walay laing mopatay nako. Ang gobiyerno lang. Polis ug naa sa gobiyerno lang. Wa koy laing gituohan.

Gidugangan lang anang mga drug lord nga grupo. Mahadlok man nang polis. Pero nagplano sab na sila. Pero, ang pinaka-authority gyud… Ang PNP buotan, pero ang tawo sa PNP maoy problema.”

Unya mipuno, nga wala siya mahadlok patyon. Iyang gipahibawo kadtong nagtinguha, nga dali ra siyang pusilon kay wala man siyay dalang armas.

Sigun sa pangagpas ni Espenido, nasuya lang niya kining grupoha tungod sa dalaygon niyang nabuhat nga maoy nakapahumot niya ni Duterte.

Ug sanglit may nayatakan man ning iyang pagkaaktibo sa war on drugs, gipangitaan siyag paagi nga mahugawan ang kalinis sa iyang rekord nga hagbay rang gisaludohan sa katawhan.

Gumikan ning pagpiit sa iya ra pong mga kauban, misidlit sa baba ni Espinido ang pagahikit-an niyang dangatan sa unahan. Matud niya: “Walay laing mopatay nako.  Ang gobiyerno lang. Polis ug naa sa gobiyerno lang.” Nagpasabot ba kini nga sulod sa PNP anaa ra dinhi maglublob ang kinagamhanang druglord or druglord protector?

Ang nakita natong resulta sa war on drugs ni Duterte mao ra gyuy bugtong makatubag niini.