“Balo lamang” og mopatoo ba!

Mga opisyales sa barangay gimandoan ug gitugyanan na karon sa DILG sa pagpatuman sa road clearing operations sa ilang tagsa-tagsa ka hurisdiksyon agi ug pagsuporta sa sugo sa Presidente nga gilatid usab sa DILG Memorandum Circular 2020-027. 

Ning maong kamandoan, mora’g malihay sa reklamo ang DILG.   Ang masugba sa baga sa kasuko sa katawhan mao lamang ang mga barangay officials. 

Kon pananglit dunay manghagis panahon sa pagpatuman sa clearing operations, mapuypoy kaha ang iyang kasuko inig wara-wara na sa Kapitan sa kopya sa Memorandum Circular sa DILG.  Matud pa sa taga-Santander, “Balo lamang”. Saoonz!

Fake news ang hinungdan

Usa ka optometrist gipasakaan og kaso human mopakatap og fake news mahitungod sa usa ka langyaw nga namatay diha sa pribadong hospital nga ang hinungdan mao ang Coronavirus Disease (Covid-19).  Sa iyang kahinam nga maka-scoop, nakalimot siya nga doctor ra diay siya sa mata ug dili siya reporter.  

Ang iyang pagpakatap sa fake news, naghimo hinuon kaniya nga “MCWD – Mora’g Correct, Wrong Diay.” Fake news pa more!

Habal-habal uyonan, trapik modaghan

Giduso karon sa Senado ang pag-amendar sa Republic Act 4136 kon Land Tansportation and Traffic Code aron mahimo na nga legal ang habal-habal og mga motor cycle for hire.  Nadungog na gayod ang reklamo sa kadaghanan.   Kon mapasar na ang maong balaodnon, makaalibyo kini sa panginahanglan ug pangabuhian sa katawhan, apan mosamot na unya ang kahuot sa dalan kay modaghan na man ang  sakyanan.  Niining atong kalisdanan, dasigon na lang nato ang ato’ng kaugalingon sa pag-ingon, “Laban lang Juan”.  Trapik pa more!

Next time joe, be careful

Gikataho nga ang Cebu City Traffic Office (CCTO) nakadakop og moabot sa kapin 16 mil ka tawo nga nakalapas sa Anti-Jaywalking Ordinance sukad sa Enero 1 hangtud sa Pebrero 14, 2020.  Wala matino kon duna ba’y langyaw nga naapil, apan sagad sa nadakpan dili taga-dakbayan.  Nakapahinumdom kini sa storya sa usa ka enforcer nga buot dakpon ang langyaw.  Apan kay naglisod man ang enforcer pag-iningles, bisan sa kadako sa salaod sa langyaw, iya na lang gibuhian dayon ingon, “Next time, be careful Joe, ha?”  Pagkatoytoy!

I-base sa siyensya, dili sa kabalaka

Miawhag ang Ambassador sa Tsina nga si Huang Xilian sa kagamhanan sa Pilipinas sa pagtuon pag-usab sa travel ban nga giimponer karon ngadto sa nasod nga China. Dugang pa sa ambassador nga ang desisyon nga motumbok sa pagsanta sa pagkuyanap sa COVID-19 kinahanglan i-base sa siyensya.  Apektado na sa travel ban ang tourism industry sa Pilipinas mao nga, tungod sa awhag, daw nahimutang ang mga opisyales sa Pilipinas sa usa ka TV game show diin papilion kon kwarta ba o kahon.  Lutaw gayod ang kahaguka sa atong desisyon nga sagad gibase lang sa kahadlok ug kabalaka.  Na hala, kamong mga opisyales dha, Study pa more!