Unsay motibo ni Calida?

Unsa ba gyuy tinuoray nga motibo sa Office of the Solicitor General sa pagsang-at og quo warranto petition batok sa higanting kompaniya sa telebisyon, ang ABS-CBN?

Tumong sa maong petition mao ang pagkanselar sa prangkisa sa TV network nga gikatakda na nga mo-expire karong Marso 30. Hangtud karon wala pa moirog sa committee level ang mga balaudnon nga nagtinguha pag-renew sa prangkisa sa ABS-CBN.

Sigun sa report giyak-an sa chairman sa kumitiba ang mga balaudnon alang niini. Gawas nga wala moirog didto sa Kongreso, mibahad na sad si Presidente Rodrigo Duterte nga iyang i-veto kun duna may balaud nga mapasar aron i-renew ang prangkisa sa ABS-CBN.

Sa laktud, sigurado nga wala gyuy dag-anan ang TV network. Apan nganong wala naman lang paabuta ni Solicitor General Jose Calida nga mo-expire ang prangkisa?

Nganong kinahanglang mosang-at sila og kaso didto sa Korte Supreme aron i-pakanselar ang prangkisa nga kapin nalang sa usa ka buwan ang nahabilin? Unsa ba gyuy nagpahipi nga motibo sa maong lakang?

Dili ba ni kabahin sa drama sa administrasyon aron makakita og lansis sa higayon nga mapakyas sa dugay nang bahad nga tak-upan ang maong TV network tungod sa tataw nga personal nga kalagot ni Presidente Rodorigo Duterte?

Sa akong tan-aw naglisud na og balibad ang Malakanyang sa pressure gikan sa mga kaalyado mismo sa presidente nga tugotan nga ma renew ang prangkisa sa ABS-CBN.

Ug aron makalikay sa kauwawan gitugyan nila sa Korte Suprema ang paghimo sa disisyon.

Bisan unsay motibo ni Calida, usa ka butang ang tataw. Iyang gisugnod ang nasud sa posibling krisis. Ang paghatag og prangkisa gahom nga gitugyan ngadto sa Kongreso ubos sa Batakang Balaud. Busa katungod sab sa Kongreso ang pagbawi niini.

Sa kasamtangan, dunay mga balaudnon nga nag-ong-ong alang sa renewal sa franchise sa ABS-CBN.

Tungod sa kaso nga gisang-at ni Calida posibling mahostage ang pagtuki sa Kongreso sa mga nag-ong-ong nga balaudnon.