Asin ug kahayag

Pebrero 9, 2020: Ikalima nga Domingo sulod sa tuig

Mga Pagbasa:  Is. 5;7-10/Sal. 112/1 Cor. 2;1-5/Mt. 5;13-16

Ang asin mahinungdanon kaayo gani sa karaang panahon. Ang asin man ang gihimong sweldo o suholan alang sa  mga tawo. Gani sa pulong asin man gikan ang pulong salary kun sweldo. Ang asin gamiton aron pag-preserve sa pagkaon, kay kun wa ang asin mahimong madaut ang pagkaon.

Gigamit pud nato kini sa pagpalami sa pagkaon, gigamit pud ato kini panahon sa exorcism pinaagi sa paggamit sa exorcised salt sa panahon nga dunay bunyag kaniadto. Sa laktod ang asin gamitonon kaayo aron maghatag og kalami sa bisan unsang kalan-on.

Sa laing bahin ang lampara kun suga kaniadto ibutang gyud sa dapit nga magdala og kahayag sa tibuok balay. Kay mag-unsa man tuod ang kadako sa balay kun wala man kini igong kahayag di ba dulom ra kaayo kini?

Kining maong sanglitanan gigamit sa atong Ginoo sa pagpahinumdom kanato nga ingon nga mga saksi sa iyang pulong ug kaniya gyud mismo kinahanglang mamahimo kitang asin ug kahayag ngadto sa ubang mga tawo. Ang atong pagkaasin maoy hagit sa atong tinguha nga  hatagan nato og kalami ang kalibutang tawhanon.

Kay ang bisan unsang maayo alang sa kadaghanan pagaisipon man nga naghatag og kalami sa tawhanong kalambigitan. Ang maayong sanglitanan ang naghatag naman og kalami. Ang naghatag og kalami maoy nakapadasig sa uban nga motampo aron ang kalibutan nga atong pagapuy-an himoon natong paraiso pinaagi sa pagtuo, paglaum ug paghigugma.

Sa laing bahin, bisan pa  man sa atong kahuyangan gidapit gihapon kita sa paggiya sa uban pinaagi sa paghimo sa atong kinabuhi ingon nga kahayag alang kanila.

Kay pinaagi lamang niini ang ubang mga tawo makaamgo nga ang paggiya diay mahimo ra diay kun motugot lang gyud ang matag usa nga ma inspired ug mohatag og inspirasyon usab alang sa uban.

Pinaagi niini ang mga tawo mas makasabot sa dakong bili sa ilang tawag ingon nga mga binunyagan. Si Jesus mao ang kahayag ug kita ang niambit sa maong kahayag.

Sa atong pag-ambit sa maong kahayag kita gipahinumdoman nga pinaagi kanato ang mga tawo mas mahigugma pa gyud unta kang Kristo Jesus. Dili kita ang sentro kondili ang atong Ginoo.

Ninadot kaayo ang linya sa awit nga Asin ug Kahayag:. Kini nagkanayon:

Busa ipadan-ag gayud ang inyong kahayag! Atubangan sa mga tawo aron makita ang maayo ninyong buhat! Ug magdayeg silang tanan sa inyong Langitnong Amahan! Ug Magdayeg silang tanan! Sa inyong Langitnong Amahan! Kamo ang Asin ug Kahayag! Ug ang liturhiya matag Sabado Santo sa gabii nagkanayon man:

"Si Kristo atong Kahayag!" motubag ang mga tawo: "Salamat sa Dios!" Ug ang maong pagpasalamat nahimong mas makahuloganon kun ugaing himoon natong isabyag ngadto sa uban ang mga kaayohan usab nga atong nadawat gikan sa kahitas-an. Ang greatest expression sa pagpasalamat mao man ang pagkamanggihatagon diha sa paghatag sa atong  kaugalingon aron ang uban mabuhi usab sa paagi nga makahuloganon!