Serbisyo publiko

Kini ang giluwatan ni Doc Rene Obra usa ka Psychiatrist sa dihang nakigkita ko niya dihang ako siyang gidapit aron mohimo og pakigpulong karong Pebrero 27, 2020 sa First Archdiocesan Lay Collaborators sa Ministry of Liberation. Very Accommodating kaayo ang maong doktor ug gani, dali ra kaayo siyang nisanong sa maong pagdapit. Daghan mi og nahisgotan apil na niini ang mahitungod sa iyang serbisyo publiko sa estasyon sa Radyo kuyog ni Atty. Bathan. Silang duha ang nipadayon sa programang nasugdan ni anhing Doktora Lourdes Libres Rosaroso abogada na, doktora pa! Ang nitukod sa St. Paul’s College. Natandog ko sa iyang giingon nga serbisyo publiko.

Sa Ministry of Liberation mahinungdanon kaayo ang role sa usa ka Psychiatrist, sa doktor, sa abogado. Ang Psychiatrist mao man ang mo facilitate sa Psychiatric Evaluation sa pasyente sa dili pa himoon ang solemn exorcism ug deliverance pray overs. Kini aron pagseguro nga ang kahimtang sa pasyente psychological ba o spiritual.

Kay ang paghimo gud dayon sa hinanaling exorcism apan walay proper nga diagnosis posible man nga magpa grabe na nuon sa kahimtang sa pasyente labina kun nag auto suggest siya nga siya dunay demonyo unya gihimo dayon ang pag supplement sa iyang pagtuo nan, mahimong mas problemado ang tanan hinuon. Imbes matabangan mosamot naman hinuon.

Hinaut unta nga kini ang mamahimong sukaranan aron mas balanse ang pagtan-aw sa kaso ug dili lang pud sa pagtuo sa mga private revelations labina kun maghisgot kita og Espiritu Santo. Kay ning paagiha mas matabangan pa ang biktima. Ang abogado sa laing bahin mao man ang kasaligan alang sa mga legal nga isyu sa higayon nga himoon na ang exorcisms. Kay ang nahitabo pananglitan sa mga pari nga nihimo sa exorcism alang kang Anelise Michel ang gikuhaan og salida nga The Exorcism of Emily Rose nga nabilanggo gyud intawon sa dihang namatay ang biktima sa malnutrition.

Ang doktor sa laing bahin maoy mohimo og pag evaluate kun physically fit ba ang pasyente sa higayon nga himoon ang exorcism sessions. Silang tulo Abogado, Psychiatrist, ug Doktor kinahanglang anaa gyud sa higayon nga himoon ang nahisgutang exorcism session. Dugang pa niini kinahanglanon gani pud ang mokuha og documentation pinaagi sa video aron mas ma document pa gyud ang mga panghitabo.

Sa dayon na nakong lakaw gikan sa maong opisina, nagkalalis ang sekretarya ingon man ang tagtungod sa pasyente kay lagi nganong wa sila replayi. Ambot kun kinsay sad-an nila apan ning mga panahon nato karon dili ikalimdo nga ang naghinobrang stress tungod sa mga problema maoy makapainit sa ulo sa usag usa kanato. Apan bisan pa niining mga hitaboa dili unta maapektuhan ang serbisyo publiko.