EDITORYAL - Kabalaka sa katilingban

Walay kahumanan kining problema sa illegal nga drugas kun magpadayon ang pagduha-duha sa publiko pagsumbong ngadto sa kapolisan kun kinsa kining mga nalambigit sa illegal nga drugas diha sa ilang mga lugar.

Samtang sayon ra para sa mga opisyales sa kapolisan ang panawagan ngadto sa publiko nga tabangan sila sa kampanya, apan sa tinud-anay lisud kining buhaton sa mga yanong molupyo tungod sa kadako sa peligrong ilang atubangon.

Sa taras ni Presidente Duterte batok sa illegal nga drugas, siyento porsiyento sa katawhan mipaluyo kaniya.  Apan nabahin ang mga tawo sa pamaaging iyang gigamit nga usa sab sa hinungdan nga dunay mga polis nga niabusar samtang nagtakuban sa kampanya batok sa illegal nga drugas.

Dunay mga polis nga nalambigit sa illegal nga drugas nga nangadakpan na apan giingon nga duna pay daghang adto pusta sa kaaway timailhan ang padayong internal cleansing sa PNP karon.

Posibleng mao kini ang hinungdan kun nganong ang mga tawo bisan sa kadako sa ilang suporta sa presidente magduhaduha paghatag og impormasyon bahin sa mga nalambigit sa illegal nga drugas sa ilang mga dapit.

Mahadlok kay basin ang ilang masumbongan kakunsabo sa mga ilegalista ug sila ug ang ilang pamilya mabutang sa peligro.

Sa Talisay City, angay saludohan ang gihimo sa ilang hepe nga si Lt. Colonel Gerard Ace Pelare nga pagbalay-balay.

O pagduaw sa mga komunidad nga bag-ohay ra nilang gipangronda batok sa illegal nga drugas dili aron manakop kondili ang pakighugoyhugoy sa mga molupyo..

Usa kini ka maayong lakang, dili man tuod sigurado kun nakadani sila og pipila aron motabang sa kampanya, apan maayo kining sinugdanan aron ipabati ngadto sa publiko nga lahi na ang mga polis karon kay masaligan na kun itandi sa kaniadtong wala pa ang internal cleansing sa PNP.

Ang adiksyon sa illegal nga drugas problema dili lang sa kapolisan o sa gobiyerno kondili sa katilingban mismo.