Pakyas ang liderato

Sa pagsuwat ning maong lindog kaniadtong Martes sa gabii, miabot na sa 105 ang gikonsiderar sa Department of Health nga Patients Under Investigation (PUIs). Ning maong gidaghanon, 90 kanila ang naka-confined sa tambalanan samtang ang 12 gipagawas na.

Miabot na sa 425 ka mga Intsik ang namatay sa 2019 Novel Coronavirus Acute Respiratory Disease aa China, usa sa Piilipinas ug usa sa Hong Kong. Ingon ani ka paspas mopatay ang mikuyanap nga virus.

Sa gipahigayon nga pagdungog sa Senado, nasayran nga anaa pa lamang sa napulog pito ka porsiyento ang dagan sa pagpangita sa DOH niadtong mga pasahero sa eroplano ug mga tawo nga gikauban ug gikasugat sa manag-uyab sa ilang paglaroy-laroy dinhi sa Pilipinas. Tungod niini gisaway sa Senado si Health Secretary Francisco Duque III gumikan sa kahinay sa iyang opisina sa pagpangita sa mga nakauban sa duha ka mga insik nga nagpositibo sa coronavirus.

Gipasanginlan ni Secretary Duque ang mga tagdumala sa mga eroplano tungod sa pagdumili niini sa paghatag sa listahan sa mga pasahero sa eroplano nga gisakyan sa manag-uyab nga nagpositibo sa Corona Virus. Apan gipanghimakak sa mga nagpalupad og eroplano ang pasangil ni  Duque.

Kun nagdumili ang airline company sa paghatag sa listahan sa mga pasahero nga sakay sa ilang eroplano gikan sa Hong Kong, nganong wala man magpakitabang si Secretary Duque sa Department of Transportation? Nganong wala man siya magpakitabang sa Department of Foreign Affairs mahitungod sa pagpugong sa pagsulod sa mga insik dinhi sa nasud?

Atol sa pagdungog, nakita sa mga senador nga sama sa gisulo ni Secretary Duque ang pagsulbad sa suliran sa coronavirus. Wala siya magpakitabang sa ubang ahensiya sa gobyerno ug wala magpugos sa iyang mga tawo sa paglihok hinungdan nga nahitabo ang pakyas nga liderato ug komunikasyon.