Terminal ibalhin

Gisaway sa akong amigo nga sakop sa media ang mga guwardiya sa Cebu South Bus Terminal kay mitugot gihapon sila nga makasakay ang mga pasahero bisan og ang bus nagbabag na sa karsada.

Resulta, nakabalda sila sa pag-agi sa mga sakyanan diha sa Natalio Bacalso Avenue, usa sa mga karsada dinhi sa siyudad nga hilabihan gyud ka-busy kay daghan kaayong mangagi nga sakyanan.

Tungod niini, angay tingali nga hinuktokan sa atong mga magbabalaod dinhi sa Dakbayan sa Sugbo kon angay ba nga tugotang makapadayon ang operation sa bus terminal diha sa Natalio Bacalso Avenue.

Ang maong terminal diha na sa maong dapit sobra sa 60 ka tuig. Kaniadto, gigamit ang maong mga terminal alang sa mga bus nga magbiyahean sa north ug sa southern towns sa Sugbo. Usa ra’y terminal kaniadto.

Kun gikan ka sa norte ug moadto ka sa south, ini’g kanaog nimo sa gisakyan nimong bus, mahimo ka nga motapon lang dayon og laing bus nga imong kasakyan paingon sa sunod nimong destinasyon.

Suheto kaayo ko niini kay kanunay man ko nga iuban sa akong mama kaniadto kon moadto siya sa lugar sa akong mga apohan sa Barili.

Maayo kaniadto kay nihit pa man ang mga sakyanan, dili pa traffic.

Apan karon, ang mga bus nga mogawas sa terminal ug molabang sa karsada – magsunod ra ba ang nagtulo ngadto sa upat ka bus – aron mobiyahe paingon sa Western ug southern towns sa Sugbo, makamugna na kini og grabeng problema sa trapiko.

Husto gyud ang sugyot nga ang adto na maghimo og south bus terminal sa SRP.

Sayon ra kaayo ni bisan og ang Cebu South Bus Terminal gipanag-iya pa sa  Kapitolyo.

Mahimo man nga kwentahon kun pila ang kantidad sa maong bus terminal, ug magbaylo og property  ang siyudad ug probinsya.

Ang siyudad na ang manag-iya sa luna nga gigamit isip bus terminal, ug hatagan niini og luna ang Kapitolyo nga magamit ug katukoran og terminal sa SRP.

Dili ba gud maayo? Sa ingon nga paagi, dili na makabalda ang mga bus sa pagdagan sa mga PUJ diha sa Natalio Bacalso Avenue.

Unya kay dili man traffic ang South Coastal Road nga anaa molagbas sa SRP, mahimo nga anha na paagion ang mga bus paingon sa ilang destinasyon.

Moresulta kini og pagmenos sa problema sa trapiko diha sa Natalio Bacalso Avenue paingon na ngadto sa Bulacao ug sa Talisay pa gani. Unta, mahunahunaan kini sa atong mga magbabalaod.