Kapakyas pagbaraw sa kagaw
Ang maayong balita mao nga kun may nasud man nga takos nga mobadlong sa pagkatap sa makamatay nga bag-ong kagaw sa Wuhan, kana way lain kon dili ang China.
Ang daotang balita mao nga ang bugtong nasud nga labing matulisok sa pagpahamtang ning wa kinahanglana nga hulga sa katawhan ug kanasuran sa kalibotan mao ra sab ang China.
Samtang ang diktadura ra ni Chinese President Xi Jinping ang nakapalihok sa tanang puwersa aron pagbadlong sa kagaw nga gikahadlokang mas pintas kay sa SARS ug MERS, iya ra sang liderato ang nakakapakatap ini.
* * *
Nikumpisal ang lokal nga mga opisyal sa Wuhan nga ilang gitago ang tinuod nga gidaghanon sa mga natakdan sa bag-ong coronavirus ug ilang gipasagdan nga makabiya ang lima ka milyon ka molupyo nga posibleng natakdan na kay nag-agad sila sa sugo sa nasudnong liderato sa People’s Republic of China (PROC).
Sa ato pa, aron ba kaha pagtabon sa ilang kataphaw sa wa dayon paghigpit sa pagbiyahe sa mga molupyo sa Wuhan o nagsulti lang gyud sa tinuod, si Xi ang ilang gitulisok sa pasiuna nga pagtago sa krisis.
* * *
Karon gipasidunggan si Xi sa pagpatukod og higanteng mga tambalanan sa Wuhan sud lang sa pila ka adlaw ug pagpakatap sa kaliboan ka doktor, nurses ug mga sundawo aron papugong sa 60 milyones ka molupyo sa higanteng mga dakbayan ug lalawigan sa pagtinakdanay.
Apan kun wa pa unta paundayoni ang taas nilang kasaysayan sa pagpamakak ug kun gitugotan pa unta ang katawhan nga gawasnong magbinayloay og kasayuran, di unta hakpon ang kalibotan sa lab-as nga epidemiya.
* * *
Ang mosunod nga mga adlaw maoy motino magmalampuson ba ang China ug ubang kanasuran sa pagbaraw sa nakakatap nga kagaw. Kun makatsamba, makapangangkon si Xi ug ubang tagduma sa kanasuran sa tanang kredito. Apan kun mapakyas, makakita silang Xi ug ubang mga pangu nga wa magtagad pagpanalipod sa mga molupyo og laing mabasol.
Sa kasamtangan, ug sama sa naandan, ang kahimsog ug panginabuhi sa kinabag-an sa katawhan maoy labing mameligro sa kapakyas sa ilang kadagkoan pagbadlong sa kalihokang nakapatakod sa mga tawo sa makamatay nga mga kagaw sa mga hayop ug pagbadlong gilayon sa nisunod nga mga epidemiya.
* * *
- Latest
