Problema sa trapiko masulbad na kaha?

Mangita kuno si Presidente Rodrigo Duterte og dako nga pondo alang sa mga proyekto pagpalambo sa inprastraktura sa Sugbo, ilabina sa sistema sa pangmasa nga transportasyon nga maoy atong seryoso nga gikinahanglan.

Siguro mismo ang presidente nakasinati na sa dakong suliran sa trapiko sa Metro Cebu nga giduso gayud niini ang dinaliang solusyon sa maong problema. Apan hinaut nga madali kini pagsulbad tungod sa nagkadako nga epekto niini sa lokal nga ekonomiya.

Duha na lamang ka tuig ang nahabilin sa termino ni Duterte. Ug dakong pangutana karon kun unsaon pag-arangkada sa mga proyekto paglambo sa sistema sa trapiko dinhi gumikan kay nagkinahanglan kini og dili tiaw nga pondo.

Hinuon adunay gihan-ay nga integrated intermodal transport system (IITS) nga naglangkob sa light rail transit, bus rapid transit, monorail ug uban pa nga gitumong pagsulbad sa nagkagrabe nga problema sa trapiko dinhi.

Apan hinay man ang pag-uswag niining maong proyekto. Hangtud karon morag wala pa kitay nakita nga konkreto nga kalamboan sa IITS human kini gi-introduced sa Department of Transportation sa publiko kaniadtong 2018.

Wala ba kaha kini nabiktima sa ka hugaw sa dula sa pulitika? Or hinay ba lamang kaha ang kamas sa mga proponents sa IITS paghandos niini ngadto sa mga hingtungdang mga ahensiya sa kagamhanan alang sa dinaliang implementasyon.

Karon nga mitingog na ang presidente, angay lamang nga doblehon pa ang paningkamot sa mga lokal nga opisyales sa Metro Cebu pagdughit sa mga hintungdang ahensiya aron nga mapadali na ang implementasyon sa maong proyekto.

Maayo kay nalili-an na sa presidente ang seryosong problema sa pangpublikong transportasyon dinhi sa Metro Cebu.

Kay kun dili kini mahatagan og dinaliang aksiyon sa kagamhanan, samot nga magkaguliyang gayud ang kamada.