Tungod sa Balaang Bata, clamp natangtang

Gumikan sa naghuot nga mga sakyanang namarking libot sa mga dalan nga nanag-alirong sa Basilica Menore del Santo Niño ning nagdagang mga adlaw sa Iyang misa-nobena ug sa strict implementation sa No Parking Policy, nagtaksi na lang ming misis paingon sa Pilgrim Center aron motambong sa 5:30 am mass.

Diha pa lang mi sa dalan Plaridel, mo-three layers na ang namarking nga mga behikulo, kini apil na sa nakaunag pahimutang sa masig ka kilid sa dalan nga may PAY PARKING ZONE signage. Hinuon, ang uban kanila nag-hazard lights.

Busa, miagi gyog kahuot ang among pag-agi niining dalana ayha pa mi nakakanaog sa dapit duol sa may entrance gate to Basilica. Nakalingolingo kong naghunahuna. Nakaingon kong mas maayo pong panakpon ni sila, uy, kay grabe kabadlungon.

Pastilan, gibaraw kong misis. Matud niya, “ay, manimba sab tawon na sila, Javy, uy! Mao nga dapat, mohatag og dakong konsiderasiyon ang kapolisang nagbantay ngadto nila.” “Manimba lagi. Pero, dapat dili gamiton ang Ginoo aron makasupak sa unsay gidili. Kun si Sto. Niño gyoy atong gianhi, unta kaantigo ta modawat ning gamayng krus nga Iyang gipapas-an nato. Gisukod ra man ta Niya, kon makapasar ba kita ning maong pagsuway.” Mubo kong pahayag. Daghang bisitang debotos, sagad adunahan, kang kansang mga mahalong sakyanan nabiktima sa clamping/towing, diin nakaadtog Ramos Police Station sulod sa public market aron bayran ang P1,500 to P2,000 nga multa.

Sagad, wala lang maguba ang kabuotan sa ilang pagsimba ug ang oras sa ilang pamahaw tungod sa maong no mercy nga policy. Maoy nakaguba pag-ayo sa ilang nawong ang kabaho sa kahugaw nga ilang nasingo sulod sa kuwerpo sa CITOM.

Gibaha sa social media ug tri-media og grabeng pagsaway ang hugtanong pag-implementar sa No Parking Policy, diin miugong ang luod pangagpas nga gituyo kuno kini sa mga magbabalaod aron lang makakuwarta. Imbes suportahan ang kalig-on sa pagtuo sa mga debotos, giguba hinuon sa clamping ug towing nga walay balatian.

Busa, dihang gituktok ni Señor Santo Niño ang kasingkasing ni Mayor Ed, clamp ug towing nga hugtanong migakos sa mga ligid ug miguyod sa mga sakyanan, natangtang! Unta, ampingan sa mga motorista. Ug dili abusaran!