Lugak sa clamping

Maayo na lamang kay milugak ang kagamhanan sa dakbayan sa Sugbo ug misugot sa panawagan nga ihikling una ang pag-clamp sa mga sakyanan sa mga manimbahay nga mag-park duol sa Basilica del Santo Niño.

 Tungod kini sa mulo sa ubang mga debotos nga inig gawas nila sa basilica human sa misa, dili na nila magamit ang ilang sakyanan kay lagi giklaman man sa mga taga city traffic management office kay lagi illegal parking.

Karon gikonsiderar na ni Mayor Edgardo Labella ug gitugotan na nga maka-park ang mga manimbahay sa sayong buntag sa ilang mga sakyanan duol sa basilica. Apan hangtud lamang kini sa pagkaugma liwas sa fiesta Señor.

Kun wala pa molugak ang lokal nga kagamhanan niini, siguro dili gayud mahuman og alburoto ang mga deboto niini. Tiaw mo nang mag-commute na lamang sila pauli gumikan kay dili na ka dagan ilang mga sakyanan.

Wala masabti sa katawhan, ilabina sa mga deboto, nga samtang nagkadaghan nga na ang nanimba sa basilica niining panahona, nagpakusog usab ang mga sakop sa city traffic management office sa ilang kampanya batok sa illegal parking.

Mao nang hilabihan ka daghan sa mga sakyanan nga giparking duol sa basilica ang ilang gi-clamped. Ug miani kini og grabeng mga reaction sa social media.

Ang uban mipagawas sa ilang kayugot sa traffic management office tungod sa pagkawalay konsiderasyon niini nga panahon man unta sa kapistahan sa dakbayan.

Kun buot hunahunaon, insakto usab kadtong adunay panawagan sa kagamhanan sa dakbayan paglugak sa lagda sa trapiko ug pasagdan lamang usa silang nga maka-park duol sa simbahan. Sinulog karon ug angay lamang nga mohatag og gamay nga konsiderasyon.

Dili sa tanang panahon nga ipatuman na lamang ang maong regulasyon kay lagi mao man ang nahisulat sa lagda. Angay usab tagdon sa city traffic management office ang panginahanglanon sa sitwasyon. Hinuon daghan ang nagpasalamat kang Labella sa daling aksiyon sa mayor sa mga bagulbol sa katawhan, ilabi na sa mga debotos.

Kay kun pabiling walay aksiyon ang lokal nga kagamhanan, aw di gyud moundang ang mga pag-alburoto.