Kon dili kaya, resign na lang

Isoga diay ning mga batabata sa mga tawo nga nagnegosyo pagpaabang og mga lantay diha sa Carbon market no? Matud ni Junil Matuguina, ang market administratot sa Dakbayan sa Sugbo, nga usa niya ka sakop gikulata kay gibadlong ang mga namutang og nagtipun-og nga lantay diha sa aseras.

Gikan niadto, mahadlok na kuno ang mga sakop sa Market Operations Division sa pag-adto sa maong dapit diha sa F. Gonzalez Street. Nakaagi man gud ko sa maong dapit kaniadtong Huwebes sa buntag ug nakita nako ang pwerte kasamok sa mga aseras sa maong dapit.

Una, wala ko makagusto sa giingon ni Matuguina nga gibati na og katalaw ang iyang mga sakop. Kon dili kamo makahimo sa gitahas kaninyo nga trabaho, hinayhinay na lang mo sa pag-resign. Unya, kinahanglan nga ikaw market administrator Matuguina, imatuod nimo nga haum ka sa katungdanan.

Limpyohi ang mga aseras sa imong teritoryo sir, kay ang utlanan ra na sa imong teritoryo gikan sa Carbon mao ang Magallanes Street.

Unya, ayaw mo kahadlok sa mga tawo nga magpaisog-isog diha sa inyong teritoryo. Kini ang timan-i, mobahag ang ilang ikog kon kamo na sab ang mangisog.

* * *

Nindot kaayo nga gimandoan sa Department of the Interior and Local Government (DILG), ang mga mayor nga dili na paagion sa nga national highways ang mga sakyanan nga tulo ang ligid.

Ang tinuod mahimo man gyud ni sa mga mayor ba kon dili lang sila mga hakog sa gahum.

Apan unsaon man, daghang mga opisyal sa kagamahanan, ilabi na sa barangay ug lungsod, apil na ang sa mga siyudad, mahadlok man nga mapilde sila sa elect.

Dugay na kaayo kining maong balaod nga gidid-an sa pag-agi sa mga national highway, apil na ang mga tricycles. Peligro man gud kaayo nga kining mga tricycles nga nag-aginod sa kahinay nga modagan.

Duna lay kondisyon niini nga kon wa na gyuy laing krsada nga magamit sa nga tricycles, anha pa sila nga makasubay agi sa karsada.

Nindot unta kon ang mga mayor sa Sugbo mopatuman niining kamandoan sa kaulohan.