Balaan nga tunob

Liboan ka mga deboto ni Senyor Sto. Niño ang misalmot sa relihiyosong kalihokan nga Walk with Jesus.

Bisan pa man sa pag-uwan wala matarog ang mga deboto sa nga mikuyog sa procession sa imahen sa Bata’ng Hesus nga gisugdan alas 4 sa kaadlawon gikan sa Fuente Osmeña subay sa Osmeña Boulevard hangtod na sa Basilica del Sto. Niño.

Halos tanan adunay dala nga imahen sa Balaang Bata, duna usay mga bata nga gibistihan sa sapot  sa Senyor.

Nindot kaayo sud-ongon ang daw bawod sa mga tawo nga gibanwagan sa mga kandila nga nagsiga.

Usa lang ang katuyoan mao ang pagsunod sa balaang tunob ni Hesus nga nagpakabata.

Panaad kini sa uban tungod sa grasya nga ilang nadawat ug ang uban naay mga pangaliya o pangamuyo sa Senyor Sto. Niño.

Labaw sa tanan gumikan sa dakong gugma sa katawhan ngadto sa Manunubos kinsa walay sukod nga pagmahal kanato.

Apan ang pangutana kon gipoy-an ba nato ang pagsunod nato kanunay sa balaang tunob ni Hesus?

“Tinuod gyud ba kita nga nahigugma Kaniya?” mao kini ang pangutana ni Fr. Jun Nohara, Rector sa Basilica del Sto. Niño atol sa iyang homily sa pagbukas sa novena mass gahapong adlawa.

Ang mga tawo mitubag nga nahigugma gyud sila sa Dios apan dihang gipangutana kon gihigugma ba usab nila ang kaaway, nagkahilum ang mga tawo.

Ikaw unsay imong tubag? Bitaw sayon sultihon apan lisod buhaton sa?

Sama sa mga deboto nga nakig away sa gwardiya sa Basilica kay wala una pasudli ang entrance kay puno pa.

Pastilan nigawas ang tinuod nga kolor sa mga tawo nga kutob lang sa baba ang ilang pagkarelihiyoso apan lahi kaayo sa buhat.