Bahala og itum basta matahum

Kini ang akong komentaryo sa akong higala nga magtutudlo nga nihimo og throwback picture sa iyang nabag-as nga kagahapon niadtong high school pa siya, but in fairness maanyag siya.

Ato lang siyang taguon sa ngalan nga Miss S. Ang nakanindot kay gawas nga maanyag buotan siya nga pagkababaye, simple ug kugihan.

Butang nga nakapadayeg nako all the more kaniya. Daw dili gyud ko mapul-an sa pagsud-ong sa iyang tabunong panagway.

Black is beautiful but too much black is charcoal matud pa nila.

Apan ning atong panahon karon gihimong sukaranan sa katahum ang kahamis ug kaputi sa panit sa matag usa.

Mao nga sa dihang nidaug ang taga Africa nga si Zosibini Tunzi ingon nga Miss Universe dunay caption nga nagkanayon: “This is the New Beautiful!” matud pa sa kadaghanan sa mga nitizens.

Kun ato kining i-relate sa atong kinabuhi diha sa atong relasyon sa Dios kitang tanan pulos mga itom tungod sa atong mga sala.

Apan bisan pa man niini padayong nakita sa Dios ang atong katahum. Ang maong katahum gihimo sa Dios nga sukaranan sa iyang paghigugma kanato sa hilabihan nga tungod niini angayan lamang nga siya atong pasalamatan.

Matahum ang iyang pagtan-aw kanato sanglit siya usab ang tinubdan sa tanang matang sa katahum. Ang awit nagkanayon:

Matahum matahum matahum si Jesus Ginoo matahum!

Nakita, nadungog, nasuwat sa bibliya, si Jesus Ginoo matahum!

Busa matahum pud unta ang atong panlantaw sa uban. Matang sa katahum nga dili lang mag-agad sa panggawas nga sukaranan.

Kondili atong sud-ongon ang matag usa segun sa iyang bili ug sa iyang pagkatawo. Bisan unsa ug kinsa pa man siya.

Ang matahum nga tawo nakahupot usab og malumong kasingkasing nga mahimong moamag diha sa paagi nga makiglambigit siya sa uban.

Kay kun puno sa kahugawan ug pagpaaron ang imong hunahuna ug kasingkasing mamahimong laksot ka atubangan sa tanan.

Kun unsa ang lente nga imong gigamit aron sud-ongon ang uban mao usab ang gamiton aron hukman ka sa kadaghanan.