EDITORYAL - Paghawan sa mga karsada

Gisampolan sa Department of the Interior and Local Government (DILG) ang napulo ka mga local government units tungod sa wala nila pagtuman sa direktiba ni Presidente Rodrigo Duterte paghawan sa mga nakaali sa ilang mga karsada.

Aron mas mapadali ang pagkatap sa impormasyon kabahin sa aksyon sa DILG, gi-live mismo ang pagduso ni DILG Undersecretary Epimaco Densing III sa mga kaso diha sa Office of the Ombudsman niadtong Disyembre 16.

Kasong grave misconduct and gross negligence ang gipasakang reklamo tungod sa ilang wala pag-aksyon. Ang gipangkasohan mao ang mga mayor sa Guinsilban, Camiguin; Pili, Camarines; Sur; Ginatilan, Cebu; Sagay, Camiguin; Manticao, Misamis Oriental; Pagsanjan, Samar; Caraga, Davao Oriental; Aurora, Zamboanga Del Sur; Baco, Oriental Mindoro; and Lapuyan, Zamboanga del Sur.

Naapil ang Ginatilan sa Sugbo sa mga gikasohan apan aduna pa unyay madugang sa mosunod nga mga adlaw gikan gihapon dinhi ug sa Abra, Davao del Norte, Samar ug Benguet.

Atol sa state of the nation address n Duterte sa miaging tuig, gimando niya sa tanang LGUs nga bawion ang mga karsada gikan sa mga illegal nga nag-okupar niini.

Gawas sa paghawan gikan sa mga babag, apil sa ilang kaakohan ang pagsigurong pirmeng limpyo ang mga karsada, agianan sa mga tawo ug sa mga sakyanan.

Bisan dinhi sa Metro Cebu, daghang mga karsada ug sidewalks nga halos dili na maagian sa mga sakyanan ug mga tawo tungod sa mga tindahan, lamesa sa mga sidewalk vendors, mga guba nga sakyanan nga gipasagdan nalang sa dalan ug daghan pang uban.

Maayo kining gibuhat sa LGUs pagpasaka dayon og kaso. Ang ingon niini nga mga aksyon ang kulang sa mga nanglabay nga mga administrasyon mao nga giabusaran sa mga tawo.

Daghang mga alarma sa sunog, ug uban pang emerhensiya ang nalangan sa pagresponde tungod aning mga babag sa karsada. Labaw sa tanan, peligro sila sa mga motorista.