EDITORYAL - Bag-ong paglaum

Laing panid na sab umaabot ang paklion karong adlawa samtang gitak-opan nato ang panid sa kasaysayan sa tuig 2019.

Bag-ong tuig, bag-ong hagit para sa tanan. Ang uban nangindahay pinaagi sa ilang mga palihi aron nga karong tuiga mas molambo pa ang ilang kabutang itandi sa nakalabay nga tuig.

Sa mga tawong dako og papel sa katilingban taas-taas sab tingali sila og pangayoon karong tuiga gikan sa panerbisyo kauban sab niini ang pagpangayo nga modako ilang impluwensya, bahandi, gahum ug uban pa.

Mga yangungong wala gani ambisyona sa mga kabus.

Sa pagatubang niining bag-ong tuig, dili unta kalimtan sa mga naa sa taas nga estado sa katilingban nga dunay mga kaparehas nilang nagpakabuhi dinhi ning kalibutana nga nakasugakod sab bisan sa ginagmay nga paagi.

Sa mga yanong tawo nga walay luho kay mahinungdanon na kaayo para kanila nga makabaton gihapon og maayong panglawas karong tuiga.  Ang abunda kanila mao ang paglaum.

Daghan tang mga kaigsuonan nga nag-ilaid ang pagpuyo diha sa mga aseras sa mga dagkong siyudad. Labyan-labyan lang sa mga tubig-tubigan nga sama ra og wala sila didto.

Sila kadtong mga tawo nga ang maayong panglawas lang gyuy puhonan ug bisan giunsa pa nila pagpaningkamot pagsaka kutob ra gyud sila diha tungod sa mga sirkumstansiyang sila ray nasayod, apan makita nga kinahanglan gyud silang tabangan.

Mao nga karong tuiga, maayo unta og matandog ang kasingkasing sa mga dunay ikasarang. Patilawon sab og gamay nga grasya kining mga kaigsuonang anaa pa gihapon sa mga aseras. Kun unsa nga tabang, sila ray paigo. Maayo tingaling balikan og lantaw sa tanan kun unsa ilang mga nahimo o natabang sa uban sa nakalabay nga tuig, ug gikan niini, planuhon sab kun unsay buhaton aron makapaambit sa uban karong tuiga.

Gikan dinhi sa Banat News, malipayon ug abundang Bag-ong Tuig para natong tanan!