Bag-ong tuig bag-ong buhis
Sa pagsugod sa bag-ong tuig 2020, dugang buhis ang pas-anon sa katawhang Pilipinhon tungod sa ikatulong sunudsunod nga tuig sa pagpatuman sa Tax Reform for Acceleration and Inclusion (TRAIN) law ni Presidente Rodrigo Duterte. Ngil-ad ning balitaa atubangan sa pait nga kamatuoran nga gamay rang usbaw sa suholan nga giaprobahan sa regional wage board alang sa mga mamumuo sa Sugbo, Bohol, Negros Oriental, ug Siquijor nga hinaot mapatuman na sab karong bag-ong tuig.
Mas pait pa g’yud ning balitaa kay nagpabiling pakyas ang gisaad sa pamunoan nga pagsulbong sa ekonomiya, pagkapapas sa katimawa, ug pagkamugna og minilyon ka kahigayonan sa trabaho tungod sa TRAIN.
* * *
Nipasalig ang Department of Energy (DOE) nga ang laing hugna sa buhis sa matag litro sa mga produkto sa lana di dayon mapatuman sa unang mga adlaw sa bag-ong tuig. Kay kinahanglan una nga hutdon ang tanang lana nga napalit sa niagi pang tuig. Sa ato pa, ang kapahamtangan og dugang buhis mao rang lab-as nga importasyon sa mga kompaniya sa lana karong tuiga.
Nipasidaan ang DOE pagpasaka og kasong large-scale estafa o pagtak-op g’yud sa mga kompaniya sa lana kon mamintaha pagpatong og dugang buhis sa karaan nilang imbentaryo. Apan mahimong malangay lang og pila ka semana apan momahal gihapon ang krudo, gasolina, kerosene, ug LPG.
* * *
Mahingpit nang P6 nga buhis nga gianam-anam sa niaging tulo ka tuig. Ang krudo, bunker fuel, ug petroleum coke usbawan karong tuiga og P1.50 matag litro. Mosaka og P1 matag litro ang gasolina, kerosene, LPG, ug lubricating oils.
Kay ipuno man sa mga uminto sa niaging tuig, mas magbaguod ang katawhan kay ang kinatibuk-ang sulbong sa gasolina mokabat og P11.20 matag litro, P5.04 matag litro sa krudo, P5.60 matag litro sa kerosene ug P3.36 matag kilo sa LPG.
* * *
Sukwahi sa mga pasalig nga ang TRAIN paspas nga mopabarug sa higanteng mga proyekto, padayon nga nagkamang ang pagpatuman sa “Build, build, build” program ni Presidente Duterte.
25% ray napatuman sa mga proyekto sa DOTr ug 30% ray napatuman sa mga proyekto sa DPWH. Labing klarong ebidensiya maong kapakyas sa pagsugod sa pagpatuman sa BRT sa Sugbo nga naaprobahan niadto pang 2014.
* * *
- Latest
