EDITORYAL - Mihinay pagtubo ang populasyon

Mihinay ang pagtubo sa populasyon sa Pilipinas sumala pa sa bag-ong gipagawas nga kasayuran gikan sa Commission on Population (PopCom).

Nihinay og 0.21 porsiyento ang pagsaka ug 1.52 porsiyento ang pagkubos niini sa kataposang katunga sa dekada gikan sa 1.73 porsiyento sugod sa tuig 2010 hangtud 2015.

Ang bag-ong resulta mas ubos sa pangagpas sa Philippine Statistics Authority nga karong Hulyo 2020 moabot na og 109.9 milyones ang mga Filipino base sa pangagpas nga 1.38 porsiyentong pagsaka sa populasyon sa tuig 2019 ngadto sa 2020.

Nigamay ang gidaghanon sa nag-edad og 0 ngadto sa 14 anyos apan misaka ang gidaghanon sa mga tiguwang.

Posibleng nagkontrol ang mga magtiayon sa pagpanganak, tungod ba kaha sa kampanya sa gobiyerno sa family planning o sa pinansyal nga rason.

Ang pagkubos sa pagtubo sa populasyon dunay maayo ug dili maayong epekto sa usa ka nasud. Maayo tungod kay menus na ang pakan-unon ug uban pang galastuhanan.

Apan ang dili maayo kun mahitabo ang nahitabo sa nasud sa Japan nga duna karoy kinadaghanang senior citizens apan gamay nalang ang nanarbaho nga nagkontrol sab sa pagpanganak.

Ang ilang mosunod nga henerasyon gamay ra ang interesadong magkaanak tungod sa pinansyal nga rason. Usa kini sa hinungdan nganong nidaghan ang mga foreign workers didto ug nihinay sab ilang ekonomiya.

Base sa uwahing record sa Japanese Health Ministry, wala kaabot og usa ka milyon ang gipanganak didto sa tuig 2017. Apan ang mga nangamatay moabot og 1.3 milyones nianang tuiga.

Kun gamay ra ang mga gipanganak dako ang tsansang magkagamay na sab ang manarbaho sa mosunod nga mga dekada. Sa pagkakaron, 62 porsiyento sa populasyon sa Pilipinas ang nanarbaho, 8.8 porsiyento ang mga tiguwang ug ang uban mga bata nga di pa pwedeng manarbaho ug wa say siguro kun ganahang magkaanak.

Kun ang 62 porsiyento moabot na sa retiring age, kinsa may makapuli kanila kun masobrahan ang pagkontrol sa pagpanganak? Dili ba kaha maapektahan niini ang ekonomiya sa nasud karon?