Motorsiklo ug pabuto hinungdan sa disgrasya

Niadtong liwas sa Pasko, Desyembre 26 usa ka lalaki ang nalandig sa Vicente Sotto Memorial Medical Center VSMMC human nabungkag ang iyang kamot dihang naigo sa pabuto nga Yolanda didto sa dakbayan sa Lapu-Lapu.

Sumala pa nga ang naasoyng Yolanda firecracker unang gidagkotan niadtong Pasko apan wala mobuto ug gitipigan sa lalaki.

Dihang nakainom siya niadtong liwas sa Pasko naggara-gara ug gidagkotan ang pabuto ug didto gyud nakabuto sa iyang kamot hinungdan nga nabungkag gyud.

Ang mga kuyamoy daw dili na maitsura tungod sa kakusog sa pabuto, laliman nga Yolanda ang ngalan nayolanda gyud hinuon iyang kinabuhi.

Sumala ni Dr. Marie Leo Pataray, ang chairman sa Emergency Department sa VSMMC, nga posibleng aduna pay mga mabuthan sa mga firecrackers sa pagsugat sa Bag-ong Tuig busa nangandam sila sa ilang mga kahimanan sa pagtabang sa mga posibleng mabiktima.

Sa data nga gipakita sa VSMMC sulod sa pito ka tuig, ang 2013 ang hilabihan ka daghan sa kaso nga ilang natala, apan nagkaubos kini sa mga misunod nga katuigan.

Apan niadtong tuig 2018 midyo misaka na sad diin kasagaran sa mga nabiktima ang mga bata ug gisundan sa mga batan-on ug hamtong.

Naa usay mga naamong lang o kadtong gitawag nga passive nga nabiktima sa pabuto.

Gawas sa mga mabuthan, daghan usab malandig sa hospital nga naaksidente sa motorseklo.

Kasagaran nila walay helmet ug nakainom og bino o hubog nga misangpot sa disgrasya.

Gani niadtong Desyembre 24 ug 25, miabot sa 50 ka mga motorcycle accidents ang ilang naatiman sa VSMMC.

Giandam na sa tambalanan ang lawak alang sa mga mabuthan ug maaksidente diin nakalatag na ang mga hiraminta.

Ngilo tan-awon kay susama gyud sa engineering tools nga naay gabas ug uban pang pangputol sa bukog o parte sa lawas nga kinahanglang i-amputate.

Gustohon man sa mga doktor nga dili nila gamiton ang naasoyng hiraminta apan magdepende gyud kini sa mga tawo nga kon dili magmatngon aw didto gyud ang ilang distinasyon.