Ang panaw sa balaang banay

DISYEMBRE 29, 2019: Pangilin sa balaang banay

nilang Jesus Maria ug Jose

Mga Pagbasa:   Sir. 3;2-6,12-14/Sal. 128/Col. 3;12-21/Mt. 2;13-15,19-23

Pinaagi sa damgo gipahimangnoan si Jose sa Anghel nga kinahanglang mokagiw sila padulong sa Ehipto kini tungod kay nabutang sa kakuyaw ang bata nga si Jesus. Gipangita siya ni Herodes aron patyon. Kini tungod kay ang maong bata nahimong hulga sa iyang trono. Dili buot ni Herodes nga siya pulihan lamang sa igong kasayon. Kinahanglang magpabilin siya isip hari. Mao nga si Jose kuyog sa iyang asawa nga bag-ohay pa lang nanganak ang niikyas padulong sa Ehipto ug nagpaabot sila didto hangtud nga mamatay si Herodes. Dili gyud tingali lalim ang ilang panaw ug kasinatian. Tingali lisud alang nila ang maong panaw labina nga kaniadto ang panaw nagkahulogan man og pagbaktas og pipila ka mga adlaw. Tingali sa maong panaw nahimong kuwang ang ilang bawon ug malisud gyud alang nila ang tanan. Apan bisan pa man niini padayon silang nagmalig-on kini tungod kay kuyog nila ang usag usa kanila. Padayon silang nilahutay tungod kay gihatagan nila og bili ang usag usa.

Ang banay matud pa mao gyud ang sukaranan sa matag katilingban. Kun wala ang banay malisud alang sa matag katilingban ang pagbarog ug paglahutay. Gani ang matag katilingban mao man ang hulagway sa matag banay nga atong napuy-an. Kun guba ang banay guba usab ang atong katilingban. Subo lang kaayo palandungon nga nahimong biktima ang banay sa nagkadaiyang pag-atake sa kadaghanan.

Kini tungod kay ang matag banay nahimong haguka gumikan sa mga sayop nga pagtuo nga moresulta og sayop nga balansayon sa kadaghanan kanato karon. Mas nidagsa ang mga batan-on nga nabuntis gumikan sa sayop nga pagsabot sa sekswalidad. Daghang mga relasyon ang nangaguba tungod sa sayop nga pagsabot sa gugma ug daghang mga bata ang wala mahatagi og igong kahigayonan nga mabuhi tungod kay gipatay naman daan sulod sa tagoangkan sa matag inahan. Ang Womb nahimo naman nuong Tomb matud pa. Busa atong iampo ang matag banay ning atong panahon karon sa ingon, ang matag panimalay mamahimong dugokan sa sibilisasyon sa gugma kay ang gugma diha sa tagsa tagsa kanato ang nahimong mas mabuhi pa diha sa atong katilingban kun kita mismo ang naningkamot sa paghimo niini ingon nga gininhawa sa matag usa.