Pag-uyog sa pagtuo

Sa akong pagsuroy sa Pasko sa Kapitolyo diin naka display ang mga baligya o produkto sa kalungsoran sa lalawigan duna koy nahibalag nga nalahi sanglit gikan sila halayong dapit nga nanimpalad dinhi sa Sugbo tungod sa pait nilang kasinatian sa yutang gigikanan.

Sila ang pamilya nga naapektohan sa sunod sunod nga linog sa Mindanao kinsa temporaryong mipalabay sa ilang kalisang sa kastigo sa kinaiyahan.

Dala nila ang ilang panginabuhian nga buwan diin ilang gibaligya sa tabo aron naa usab silay kakuhaan sa ilang inadlaw adlaw nga panginahanglan ug ikapadala usab sa mga nahabiling pamilya didto sa General Santos.

Kung kalisang na gani kuno ang hisgutan wala na gyuy kabutangan, nag awas awas na tungod sa walay puas ang pag tay-og.

Samotan pa nga mitay-og na usab ang 6.9 magnitude nga linod niadtong adlawng Domingo sa hapon.

Ania man sila sa Sugbo apan gusto na nilang mouli kay nabalaka usab sa kahimtang sa ilang pamilya didto sa Mindanao.

Dili nato ma imagine ang gibati sa kaigsoonan nato nga nakasinati og kalipong sa sunod sunod nga pagtay-og sa linog.

Gani kita mismo dinhi sa Visayas nakasinati man og mas kusog nga linog niadtong 2013 nga 7.2 magnitude magnitude apan bisan taod taod na mabatyagan pa man nako kon unsa ka makalilisang ang lihok sa yuta niadtong tungora.

Tinood dili matag-an ang linog apan mapangandaman kini pinaagi sa sobsob nga pagpahigayon og mga drills.

Apan unsaon man na ang drill kon ang mga building mismo dili makabarug o mahugno tungod sa kusog nga pagtay-og?

Dili sa pag unsa apan makaingon ta dinhi sa Visayas partikular na sa Sugbo nga wala na mahamok sa mga natural calamity pwera buyag kay ang kaulohan gikuso kuso sila sa bagyo samtang ang Mindanao giuyog usab sa mga kusog nga linog.

Ako gipanguyawan baya simbako lang basin baya og hilom lang kaayo dinhi sa Kabisay-an apan mokalit lang unya og buto ang bisan unsa nga panghitabo.

Kun dili madala sa tawhanon nga pagpangandam, aniay labing gamhanan ang makapugong sa Linog ug bisan unsa nga katalagman mao ang hugot nga pag ampo sa Ginoo.

Busa atong ihangad ug itahan ngadto sa gimbut- an sa Labawng Makagagahum ang mga panghitabo sa atong  kinabuhi.

Ang linog gituyo kini nga mahitabo aron sa pag uyog sa atong pagtoo Kaniya nga naglalang kanato.