EDITORYAL – Asa naman ang mga nurses?

Mahinungdanon kaayo nga dunay mga tambalanan sa lugar diin magtrabaho o magpuyo. Apan unsaon man kun ang mga tambalanan kuwang pa sa gamit kuwang sab sa mga hospital staff?

Kaning problema dili lamang dinhi sa Sugbo kondili halos sa tanang mga tambalanan sa tibuok nasud, pribado man o publiko.

Ning bag-ohay lang, dunay report nga nihit kaayo ang nurses karon sa mga pribadong mga tambalanan dinhi sa Sugbo mao nga apektado ang ilang serbisyo sa mga pasyente. Ang mga pribadong tambalanan dili ikalimod mas ganahan ang publiko kay lagi paspas ang serbisyo. Natural kay ang kapaspas sa serbisyo may mopatak man sa balayrunon ini og hatag na sa hospital bills.

Sa laktod kadto rang may ikabayad o ba kaha adunay private insurances ang modangop sa mga pribadong tambalanan.

Kay dili sab ikalimod nga ang mga pangpublikong mga tambalanan dugay sab kaayong maatiman dili lang tungod sa kakuwang sa mga hospital staff sama sa nurses kondili nagsugwak gyud ang mga pasyente gikan sa mga kabus nga pamilya.

Hain naman diay ang mga nurses dinhi? Dili ba kada tuig liboan man ka nurses ang napuno?

Gani tungod sa kadaghan kaniadto sa mga nurses, dunay ubang tambalanan mao pay magpabayad sa mga nursing interns aron lang makasud sa ilang tambalanan.

Tinuod ang mga report nga gagmay ra kaayo og sweldo ang nurses sa pribadong mga tambalanan. Dili man tuod parehas kadaghan og pasyente sama sa mga public hospitals, apan sa gihapon mao rang trabahoa.

Ang mga nurses karon atoa na manarbaho sa mga Business Process Outsourcing (BPOs) nga sa pagkatinuod katulohon o kaupaton ang suholang ilang gi-offer sa mga empleyado layo ra kaayo sa sweldo gikan sa private hospitals.

Way laing makatubag bahin sa pagnihit sa nurses kondili ang mismong mga private hospitals. Nganong namiya kanila ang ilang mga nurses ug kun nganong dili na kaayo maengganyo ang mga bag-ong nurses pag-apply kanila.