Kalipay taliwala sa kalisdanan

DISYEMBRE 15, 2019: Ikatulong Domingo sa adbiyento

(Gaudete Sunday)

Mga Pagbasa:  Is. 35;1-6,10/Sal. 106/San. 5;7-10/Mt. 11;2-11

Kasagaran nato atong ipasangil ang kagul-anan gumikan sa atong kasinasitian sa kakuwangan. Mao nga makadungog kita og mga panahom sama sa: “Mas maayo gyud siya kay naa niya ang tanan! Gwapo, kwartahan, sikat ug uban pa! Mao nga malipayon siya!” Ang pangutana tinuod ba kaha? Kay sulod sa 13 nako ka mga katuigan sa pagpangalagad, akong nasugatan ang mga tawo nga naa na nila ang tanan apan pabilin silang haw-ang diha sa ilang kinabuhi. Duna toy kaila nako niingon nga mag-unsa man tuod kun millions iyang income apan wa siya’y anak ug nga mag-unsa man tuod ang tanang napondar niya nga sa kaulahian iya raman diay biyaan? Tinuod ang maong panahom sa maong tawo ug sa katapusan niingon siya kanako nga ang bugtong bililhon sa kalibutan mao ra gyud ang maayong relasyon sa Dios ug sa mga tawo.

Ning Ikatulong Domingo sa Adbiyento, gipahinumdoman kita nga dili babag ang kakabus diha sa paglipay sa taliabot nga Ginoo.Si Juan magbubunyag sa ebanghelyo nato gibati og kaguol kaha tungod kay siya nabilanggo ug alang niya daw sa hanap pa ang timailhan nga hapit na ang Mesiyas moabot. Mao nga iyang gisugo ang iyang mga tinun-an sa pagpangutana kang Jesus kun siya ba ang gihisgotan ni Juan o kinahanglang magpaabot pa ba sila og lain. Imbis tubagon ni Jesus ang maong pangutana sa mas direktang paagi iya naman hinuong gipaagi og mga sambingay pinaagi sa pahimo og paghulagway sa mga buluhaton sa usa ka dinihogan o mesiyas diin gipagula ng mga yawa, gisangyaw ang maayong balita ngadto sa mga kabus, giayo ang mga masakiton, gipalakaw ang mga bakol ug gidala ang maayong balita sa kalingkawasasn alang sa mga bininhag.

Tuod, lisud ang kinabuhi karon apan dili kini maoy sukaranan nga ato na lamang ihiklin ang pagsaulog nga malipayon sa pagkatawo sa atong manunubos. Angayan lamang nga atong patalinghogan ang hagit sa awit nga pastorella nga gihatagan og kinabuhi sa henyong hunahuna ug diwa sa musika ni Mons. Rudy Villanueva nga nagkanayon:

Karnero sa Sibsibanan, tanum sa kaumahan! Nunot kamo kanako kay akong halaran! Tambol sa musikero lingganay sa simbahan! Sadyaon ta king yuta, king masulob-ong yuta kay niabot si Jesus nga manunubos sa kalibutan!