Dili kayo makasabot

Sigun sa resulta sa Program for International Student Assessment (PISA) 2018 ang mga tinun-an nga mga Filipino nahimutang sa ika 79 nga dapit sa 79 pod ka mga nasud nga gitun-an mahitungod sa pagbasa ug pagsabot. Nahimutang pod ang mga Filipino nga tinun-an sa ikaduha gikan sa katapusan kun hisgotan ang Math ug Science.

Ang pagtuon gituyo aron masukod ang abilidad sa 15 anyos nga mga tinun-an sa pagsabot sa ilang gibasa, mathematics ug science.

Ang Alliance of Concerned Teachers (ACT) mibasol sa K-12 nga programa nga mao ang hinungdan sa pag ubos sa kalidad sa edukasyon sa nasud.

Si Joselyn Martinez, Chairperson sa ACT nagkanayon nga wala nila gikonsiderar nga solusyon ang K-12 nga programa sa pagkuha sa Globally Competitive nga edukasyon nga mao ang gitinguha sa Departamento sa Edukasyon.

Makalibog ang resulta sa PISA 2018 tungod kay baliktad kini sa atong gituhoan ug gipaabot nga resulta. Dako ang akong pagtoo nga motaas na ang kalidad sa atong edukasyon tungod sa gipamugos sa pagpatuman nga K-12 nga programa. Apan dakong tamparos sa mga opisyal sa edukasyon ug gobyerno ang nahimong resulta.

Gipamahayag ni Deped Secretary Leonor Briones nga ilang tutokan ang problema sa edukasyon. Unsay buot ipasabot sa Sekretarya sa Departamento sa Edukasyon, karon pa sila sila mototok sa suliran?

Daghan ang rason nganong miubos ang kalidad sa edukasyon ug kining maong mga rason kanunay nimong masugatan matag abli sa klase sama sa kakuwang sa mga magtutudlo, lawak saringanan, mga kagamitan ug nag awas nga mga tinunan. Gawas niini, aduna pay laing suliran nga mitumaw nga makapaluya sa mga magtutudlo sa ilang pagtudlo ug kini mao ang ubos nga suweldo nga ilang madawat.

Hangtod dili masulbad kining maong suliran, dili gayod makapaabot og maayong resulta sa kalidad sa edukasyon ang nasud.