Misidlit ang pamintaha sa water concessionaires

Kon ang Sugbo nagproblema sa suplay sa tubig, samot na ang Manila. Ang mga dagkong dam nga gigikanan sa pagsuplay og tubig, bisan pa sa nangaging kusog ulan nga mipabaha sa siyudad ug lainlaing dapit sa Manila, ang water level niini wala makaabot sa sukod nga makahatod og igong panginahanglan sa tanang kunsomidor kada adlaw.

Busa, mimando si Pres. Rodrigo R. Duterte sa tanang hingtungdang ahensiya pagpahigayon og kasulbaran niini kutob sa unsay mahimo. Hangtod iyang gisubay unsa gyoy hinungdan sa water crisis nga natagamtaman sa katawhan. Dili lang sa kakulang. Hasta sab sa bayranan.

Niining bag-o, gibaharan ni Duterte ang water concessionaires: Manila Water and Maynilad Water Service Inc. nga pasakaag kasong economic sabotage tungod sa pagpiit-puga (pinaagi sa balayranang tubig) sa mga Pinoy, kinsa gihimo sa consessionaires og gatasan, diin binilyon ka pesos ang nakuha sa mga bentahoso.

Usab, matud pa niya, nga ang concession contract sa maong concessionaires makapadehado sa katawhan kay gidid-an sa maong kontrata ang gobiyerno nga maoy magbuot sa pag-adjust sa bayranan sa tubig.

Lalim bay, ang nagpinirmarhay sa maong kasabotan, wala mag-ila sa tubig nga iyaha sa kinaiyahan, kondili, iyaha sa panginahanglan. Meaning, nga ang tubig nga unta para sa katawhan, giangkong iyaha sa concessionaires nga minegosyo niini.

Ug daghan pang kahiwiang gibulgar si Duterte bahin sa namirmang government officials sa concession contract, diin ang tanang pabor atua sa concessionaires ug daw naggapos sa gobiyerno ug konsumidor aron dili makalihok-bawos bisag unsaon og daogdaog sa mga mat-ang negosyante. Mao diay, nga sila ray sigeng hawod, samtang kitang nia sa ubos, pabiling naglisod.

Daw gipislit ang kasingkasing ni Duterte dihang mimando ang Singapore-based court nga pabayrag P7.39B sa atong gobiyerno ang Manila Water nga gidumala sa Ayala gumikan sa  pagbasura sa gipangayong pataas sa water rates niini sukad pa 2015.

Ug misidlit gikan sa masuk-anong baba ni Duterte ang grabeng pamintaha sa water concessionaires nga nagtug-an unsa ang matang sa mga presidente nga atong naagian kon ikomparar niya. Unya siya mipuno: “Mamatay man ko tungod sa akong gihimo, at least, nakasinati mog presidente nga nagmahal sa atong nasud.”

Pagkatahom sa tinuorayng kinaiya nga gusto niyang ihulagway.