EDITORYAL - Nabiyaan na ang Pilipinas

Sumala pa sa report, ang Pilipinas naa sa katapusan sa listahan sa 75 ka mga nasud sa natad sa pagbasa. Ang mga tinun-an niini nalupigan pa hinuon sa mga silingang mga nasud. Ang maong resulta gikan kini sa gihimong eksaminasyon sa 6,000 ka mga tinun-ang nag edad og 15 anyos o mga tinun-an karon sa Grade 9 gikan sa 75 ka mga nasud.  Ang eksaminasyon gipahigayon  Organization for Economic Cooperation and Development (OECD) pinaagi sa ilang Programme for InternationalStudent Assesssment (PISA) nga ang tumong mao ang pagsukod sa kahibalo sa pagbasa ug salabotan sa mga bata bahin sa ilang gibasa.

Nakita sa resulta nga sa reading comprehension o pagbasa ug pagsabot kun unsay gibasa, 340 puntos ray nakuha sa Pilipinas, ubos kaayo kini sa 480 puntos nga average o matawag nga kasarangan.  Samotan na sa math ug science, nakakuha ra og 353 puntos ug 357 ang Pilipinas nga layo ra sa average nga 489 puntos.

Nakita sab base sa resulta nga maayo ang mga tinun-an sa Pilipinas pagpangita og impormasyon, apan kun pangutan-on, magnganga lang kay wa diay  kasabot unsay gipasabot sa ilang gibasa.

Pagkabati. Bisan unsaon pa og esplikar makita gyud nga biya kaayo ang Pilipinas sa ubang mga nasud. Mao nga di na ikahibulong nganong daghang mga nakahuman og kurso nga dili linya sa ilang gieskuylahan ilang mga trabaho karon.  Mao ba kini resulta sa gipasiatab sa DepEd nga “no child left behind?” Papasaron para sa sunod level bisan di makamaong mobasa?  O ang kakuwang sa mga magtutudlo ug kagamay sa ilang sweldo?  O resulta sab kini sa naghinobra ng pagkinto sa mga magtutudlo tungod sa kahadlok nga mareklamo sa mga ginikanan tungod sa kaestriko sa pagtudlo?  Imbes pugson ang mga bata nga makat-on bahala nalang kaysa mapriso ug mawad-an pa sila og trabaho.  Bisan unsa pay rason, kinahanglang mangita og pamaagi ang DepEd kay bisan tinuod mao pa kini ang unang higayon nga niapil sa maong pasulit ang Pilipinas dili kini rason aron mabiyaan ang nasud. 

Anugon lang kay ang DepEd adunay labing dako nga budget matag tuig kun itandi sa tanang departamento sa nasud.