Ang gasa

Dili madugay saulogon napud nato ang Pasko sa Pagkatawo sa atong Ginoo. Ning maong kasaulogan mamahmong komon alang sa kadaghanan ang paghimo og Christmas Parties bisan asa. Niadtong bata pa ko lingaw kaayo mi sa gasa nga mobalor lamang og pila ka pesos. Nga sa ato pa, exxciting kaayo ilabina kun Pasko na!

Apan sa laing bahin mahimong atong himoon nga kahimanan sa espirituhanong panaw sa Pasko sa Pagkatawo sa Ginoo kun ugaling atong pamalandongan ang atong mga gasa nga atong ihatag kaniya. Kini naglangkob ning mosunod nga proseso:

1. Una ang pagpangutana kun kinsa man ang imong hatagan? Lalaki o babaye ba sya? Unsa iyang gusto o hilig? Ning paagiha imong gipakita nga importante alang nimo ang maong hatagan nga tungod niini naghimo ka og personal nga pakigsusi. Tumong nimo nga malipay siya nga imong hatagan ug iyang ma appreciate ang imong gihatag.

2. Ikaduha, unsay imong ihatag? Dili lang kini mahitungod sa presyo o sa butang kondili mahitungod kini sa imong kamanggihatagon. Sa imong paghatag niini, imo kining gipakapinan og paghigugma. Kay ang paghatag og bisan unsa nga way gugma sama ra sa paghatag og token kaniya. Ang gugma nagasukad sa dakong tinguha nga dunay personal touch ang matag pagpaambit nga pagahimoon.

3. Ikatulo, unsay imong iputos. Dili kini mahitungod sa putos lamang ingon nga dayandayan sa maong gasa kondili ang putos usa man ka paagi sa paghatag og surpresa alang kaniya nga hatagan nimo niini.

4. Kanus-a man nimo kini ihatag? Di lang kini mahitungod sa panahon nga imong ihatag ang maong gasa kondili sa higayon nga imong itahan ang imong kaugalingon alang sa maong kahigayonan nga ikaw makahatag.

Kun ingon ini kita ka metikuloso sa atong pagpangandam sa atong naandang Christmas party ingon ini ba usab kita ka delikente sa pagpangandam sa atong kaugalingon ingon nga mga gasa alang sa Emmanuel ning nagsingabot niyang pagkatawo?

Ang Dios dili buot sa mga halad sinunog. Hinunoa gipangita niya ang usa ka mapaubsanon nga espiritu ug mahinulsolong kasingkasing. Kini mao ang pinakaanindot nga gasa nga atong mahatag ngadto kaniya.

Ning paagiha, mas malipay ang Dios nga tungod sa iyang dakong gugma kanato ang nihatag ingon nga gasa alang kanato sa iyang bugtong anak nga si Jesu Kristo atong Ginoo nga gipahimugso sa pasungan aron kita malamdagan sa kahayag sa iyang kaluwasan.