Way paglubad nga Grand Halad
Sa makausa pa, nasaksihan na sab ang talagsaong pasundayag sa pagtinabangay sa mga Sugbuanon atol sa labing dakong piyesta sa libreng mga pangalagad, ang Grand Halad sa Kapamilya, nga gihimo tibuok adlaw gahapon sa Mabolo Elementary School sa Dakbayan sa Sugbo.
Mas sayo ug mas daghan kay sa naandan ang nanambong sa kalihokan. Alas-4 pa lang sa hapon niadtong Biyernes, 14 ka takna sa wa pa sugdi ang Grand Halad pinaagi sa Santos nga Misa ni Msgr. Ruben Labajo, may nagtapok na sa ganghaan sa eskuylahan namasin nga makauna sa linya.
* * *
Gipunsisokan pag-ayo sa katawhan, puno sa naandan nga libreng tambal, ibot sa ngipon ug antipara, ang mga sinakong bugas nga gipanghatag sa Archbishop Teofilo Divine Mercy Communities nga gipangulohan ni Padre Francisco “Paking” Silva ngadto sa duha ka libo ka pamilya nga nag-una sa linya.
Bisan sa naglingiting nga kainit tibuok adlaw, nga giputol lang kadiyot og taligsik sa sayong buntag, malipayon ang mga nakadawat nga nagbaswat sa mga sako nga gisudlan og taglima ka kilong bugas humay sa ilang paglibot sa uban pang gihalad nga libreng mga pangalagad.
* * *
Ang nagbaha nga mga hinabang gikan sa adunahang kahugpoan, mga kompaniya ug mga magpapatigayon ngadto sa labing kabos nga mga pamilya nga nihatod sa ilang linuto nga mga pagkaon alang sa mga boluntaryo ug sa mas gipanggutom nga mga pasyente nalabwan lang sa naghingapin nga pasalamat sa kaliboan nga natabangan.
Tinuod gyod nga way adunahan nga wa magkinahanglan og tabang. Apan salamat sa Grand Halad mas tinuod nga way kabos nga way ikatabang.
* * *
Namauli ang mga nanambong sa Grand Halad nga nagbawon og talagsaong kalalim ug katagbaw: Ang mga natabangan napasaligan nga wa mag-inusara bisan sa labing ngiob nga yugto sa ilang kinabuhi; samtang ang mga nakatabang nakatugkad sa kalawom sa kahulogan sa kinabuhi alang sa uban.
Gikan sa kinauyokan nga bahin sa kasingkasing sa mga tigpasiugda sa Grand Halad sa Kapamilya matag Hunyo ug Nobyembre matag tuig, nga maoy labing unang moangkon nga wa silay mahimo kon di pa tungod sa way kinutoban nga kamanggihatagon sa mga Sugbuanon, daghang salamat sa hingpit nga pagsalig sa tanang nitabang ug natabangan.
* * *
- Latest
