Panghasi batok sa kabus

Di ikalimod nga  daghan sa mga ambulant ug sidewalk vendors ang badlongon.  Bisan kapila na nimo badlonga mobalik gyud gihapon sa ilang pwesto. Apan kinahanglan ba nga sila hasi-on ug dagmalan sa mga tinugyanan sa buhatan sa gobyerno nga gitahasan pagbadlong nila?

Mikatap sa social media ang video sa usa ka tindero nga gitabangan sa tulo ka mga kawani sa Prevention, Restoration, Order, Beautification, Enhancement (PROBE) team sa dakbayan sa Sugbo niadtong Huwebes didto gawas sa usa ka dakong mall sa North Reclamation Area. Makita sa video nga giparok-parok sa puthaw nga railing sa sidewalk ang tindero samtang kini naningkamot intawon pagkab-ot sa bangkat nga gisudlan sa iyang mga baligyang prutas. Sa akong tan-aw wala may pirmaninteng pwesto ang maong tindero nga posibling makababag sa agianan.

Daghan ko nakit-an sama niya nga maglukdo intawon sa ilang baligya ug ipanghagad sa mga tawo nga ilang masugatan diha daplin sa karsada. Hasta ba diay ang pagpanuroy og baligya gidili na dinhi sa dakbayan?

Kun duna may kalapasan nga nahimo ang maong tindero gikinahanglan ba nga ingon niadto ka salbahis ang pagdakop niya? Ang pangulo sa PROBE nga si Raquel Arce miangkon nga napuno na ang iyang mga sakop tungod kay kadaghan na nila madakpi ang maong tindero.

Wala gyud kuno motagam bisan kanunay ni nga makabayad og lukat sa iyang mga baligya. Tungod ba kay wala motagam ug makalukat siya sa iyang mga baligya ingon na niadto ang ilang gihimo? Gipangutana ba sa mga opisyal sa dakbayan sa Sugbo ang ilang kaugalingon nganong bisan kanunay siyang giabog ug gidakop padayon gihapong misugal ang maong tindero?

  Dili kaha ang hinungdan, nganong padayong nanimpalad ang pobre diha sa kadalanan bisan sa hulga nga siya dakpon, mao ang kapakyas sa kagamhanan paghatag niya og alternatibong luna aron siya makatarong sa pagpanginabuhi?

Nanlimbasog ang pobre aron mabuhi sa limpiyo ug tarong nga paagi. Busa inay hasi-on ug dagmalan sa mga ahente sa gobyerno, angayan silang suportahan ug tabangan.

Hinaut makabaton og kaikog ang mga opisyal sa dakbayan sa kabus nga mga tindero nga ilang gikulban sa kaldero apan milingiw sa tataw nga mga kalapasan nga gihimo sa dagko ug adunahang mga negosyante dinhi sa dakbayan.