Lahi na ang panahon

Nunot sa gipamulong lang nga kamandoan ni Presidente Duterte, mihimo og mga pagronda ingon man pagpang-embargo sa mga vaping devices (hunsoy/kuwako) ug mga electronic cigarettes ang mga kapolisan. Apan gikwestiyon karon sa usa ka huwes ang maong lakang nga gibuhat sa kapolisan kay wala kini igong legal nga basehan.  Lahi na ang panahon karon. Kaniadto, ang hunsoy ug kuwako mahimong hinungdan nga makapanag-iya ka ug halapad nga kayutaan; apan karon, mahimo na kining hinungdan nga mabalhog ka, bisan kadiyot lang, sa bilanggoan.  Sigarilyo pa more!

Dakpon aron dunay buhi-an

Apan sa susamang balita, namulong ang tigpamaba sa Philippine National Police nga mahimo gihapon nga manigarilyo ang katawhan ginamit ang electronic cigarettes diha sa mga publikong lugar nga gitagana sa pagpanabako.  Ang mosupak sa kamanduan, matud pa, dakpon, itala sa police blotter ug dayon buhian ra usab.  Mora man kining kalakiha sa duwa nga GOLF, nga matud pa sa akong magtutudlo, makalibog nga duwa.  Kay lagi, sa maong duwa, bunalan man ang bola aron mawala, unya kon mawala na, pangitaon na usab ang bola aron kon makit-an na, bunalan na usab aron mawala na pud.  Nagtuyok-tuyok lang!

Kinsay tag-sala?

Nag-viral karon sa social media ang video diin makita ang mga kawani  sa PROBE nga nakigbunlotay sa paninda sa usa ka fruit vendor didto sa dalan A. Soriano ug laing usa ka manindahay og sigarilyo ug mga karmelitos sa may South Bus Terminal.  Segurado nga adunay ipahigayon nga imbestigasyon bahin niini aron matino kon kinsa ang tag-sala.  Apan kon ang video ang tan-awon, mora’g nakahukom na ang kadaghanan kon kinsa’ng buhat ang salawayon.  Haring Lungsod man kaha ang katawhan, naa diay hari nga dili tahoron? Naa jud mga empleyado nga garaon, sama nga naa pud mga tawo nga badlongon.  Faeetz!

Dakong baligho

Gikataho nga adunay tulo ka suspetsado sa pagpatay sa Ako Bicol Party-list Rep. Rodel Batocabe nga nahatagan hinoon og dakong ganti bugti sa ilang gitug-an nga impormasyon aron madakpan ang mastermind ingon man ang mga tinuod nga mamumuno. Sayon ra kaayo ang pangwarta niining mga tawhana: modawat og suhol aron patyon ang usa ka inila nga tawo, unya, kon madakpan, motug-an kon kinsay nagsugo aron usab mapremyohan.  Kadakong baligho labi na gayod kay ang gobyerno ang nagpasiugda sa paghatag sa pabuya.  Pagkatoytoy!

Nagsipok kay gihikawan

Usa ka langyaw nga Briton ang gisikop sa kapolisan human giakusahan sa iyang Pinay nga kapuyo sa kasong pagpang-dagmal.  Ang kasuko sa langyaw, matud pa, naggumikan sa pagdumili sa kapuyo sa pakighilawas kaniya.  Apan ang babaye mitubag nga dili na siya ganahan kay, gawas nga baho kuno  ang lawas ug gininhawa sa langyaw, dili na usab mobarog ang iyang kinatawo. Sayon sulbaron ang problema sa baho sa tawo; ang malisod mao ang pagsulbad sa problema sa kinatawo. Makasipok gyud diay sa pangisip kon hikawan ang tawo niining maong matang sa kalipay.  Alegre ang kinabuhi!