Giisnab ra ang mga sugo
Di ni unang higayon nga ang mga sugo ni Presidente Rodrigo Duterte wa ipatuman sa mga opisyal sa iyang pamunoan o kon gipatuman man giusab ang orihinal niyang katuyoan:
- Ang iyang sugo pagsuspenso sa importasyon sa commercial rice hingpit nga gisukwahi sa Department of Agriculture (DA) ug sa iyang economic managers nga igo lang nipatuman sa mas higpit nga mga lagda pagsusi sa kalidad sa bugas gikan sa ubang kanasuran; ug
- Sa iyang sugo pagdakop sa mga mag-vape, katunga ray gipatuman sa kapolisan, vapes ray gisakmit ug way gidakop.
* * *
Ang mas higpit nga lagda sa importasyon sa commercial rice gisugdan pagpatuman sa Bureau of Plant Industry (BPI) sa DA niadto pang pagsugod sa Oktubre, kapin sa buwan sa wa pa ang nag-usab-usab nga sugo sa presidente pagsuspenso, di pagsuspenso, pagsuspenso ug di pagsuspenso sa importasyon.
Wa gani diay kahibawo ang presidente, o kon napahibawo man mahimong nataligam-an lang niya, nga naibanan na og sobra sa katunga ang gidaghanon sa imported commercial rice sukad niadtong Oktubre mao nga nahukman sa economic managers nga wa na kinahanglan ang pagsuspenso sa importasyon.
* * *
Ang officer-in-charge (OIC) sa Philippine National Police (PNP), Lt. Gen. Archie Gamboa, maoy unang nisalikway sa pasalig sa presidente nga ipatuman nang pagdili sa pag-vape sa publikong mga dapit bisan wa pay balaod kay mosunod rang iyang executive order.
Si Gamboa, nga nadestino sa Davao ug abogado (duha ka labing madanihong mithi alang sa presidente), nipasabot nga di sila makadakop ni bisan kinsa kay ang gisulti rang sugo sa presidente nagkinahanglan og pormal nga publikasyon una ikapatuman.
* * *
Ambot mosugot ba si Presidente Duterte nga isnabon sa iyang mga sinaligan ang iyang mga sugo. Mahimong di ra magsapayan. Kay niluwat sab og mga pasidaan nga iya nang nakalimtan:
- Way nahitabo sa hulga pagpalagpot sa kurakot nga mga opisyal sa Philippine Charity Sweepstakes Office (PCSO) bisan nabalik nang lotto ug small town lottery (STL);
- Wa na igdungog ang iyang hulga pagtaktak sa dul-an sa gatos ka opisyal sa Bureau of Customs (BOC); ug
- Di na lang nato hisgutan ang iyang pasidaan pagbadlong sa ilegal nga drugas sud sa tulo ngadto sa unom ka buwan pagbanos sa Malakanyang.
* * *
- Latest
