Maanad ra kaha?

Dili pa lang dugay gipatuman ang “No Ticket No Entry Policy” sa Cebu South Bus Terminal ilabi na niadtong pagdagsa sa mga tawo atol sa tingpamauli sa mga pasahero alang sa Kalagkalag.

Dili gyud tiaw nga kahasol ang namugna niadto sa mga tawo tungod kay huot kaayo ug taas ang linya nga niabot na gani sa gawas tungod sa pagsugwak sa mga pasahero.

Apan tumong sa palisiya nga molukat daan og ticket ayha makasulod aron malikayan nga dunay mga tawong mosakay sa panahon nga mamiktima sa mga tawo sulod sa terminal sama sa mga kawatan.

Gawas pa malikayan usab nga magdasok sa waiting area ang mga pasahero ug dili usab magkayagaw ang mga tawo.

Tinuod man hayahay ug hamugaway kon anaa ka na sa waiting area kay bugnaw ang dapit apan sukwahi kaayo sa kadtong wala pa makasulod kay susama sa kalbaryo ang sitwasyon.

Matud sa Kapitolyo nga ang kahasol termporaryo lang ug mas makaayo ang sistema nga gipatuman kay luwas man ang terminal gikan sa mga dautang elemento.

Sa maanad ra ang mga tawo ug maka-realize nga alang ra sa kaayohan sa tanan ang “no ticket no entry policy.”

Kong nakahimo ang airport sa ingon niini nga palisiya nganong dili man mahimo sa bus terminal? Bitaw posible gyud nga maanad ra ang mga tawo kay sukad kaniadto naandan na sa mga tawo ang kinaraan nga sestema.

Apan sa panahon sa ting-uli ilabi na sa weekend, nagkagrabe man gyud ang kalbaryo sa mga sumasakay tungod sa kahasol.

Gani ang uban mangita nalang kuno og pamaagi nga dili na moagi sa CSBT, apan kadtong walay ikasarang aw mag-antos gyud hangtod maanad ra sa kadugayan.

Ang pangutana dili ba kaha kini moani og kalagot sa katawhan kay hangtod karon mag-viral gihapon ang mga hulagway ug yangongo sa mga sumasakay nga kuninitan dayon sa mga netizens nga negative kaayo ang pagtan-aw sa sistema.

Ang bati nga kasinatian basin baya og magbilin kini og uwat sa balatian ug sa hunahuna sa mga tawo nga dili nila malimtan inig abot sa adlaw nga manuktok na usab sa ilang suporta ang mga opisyal nga nagpatuman niini.

Hinuon hatagan lang nato og chance kon maanad ba gyud sila sa sistema nga gitumong alang kuno  sa kaayohan sa kinabag-an.