Dagkog kaon

Gilabwan karon sa Pilipinas ang China sa kakusog ug kadagko’g kaon og bugas humay. Niining buwan sa Nobiyembre 2019 nag una sa tibuok kalibotan ang Pilipinas sa pagpalit og bugas humay sa gawas sa nasud.

Gipuhalan na niini ang nasud nga China. Mao ni ang gipagawas nga taho sa United States Department Agriculture-Foreign Agricultural Service (USDA-FAS).

Sa miaging buwan ang Pilipinas hapit lang makatabla sa China sa pagpalit og bugas sa gawas sa nasud nga hapit moabot og tulo punto uno ka milyon metriko tonelada sa gawas sa nasud.

Ang Pilipinas gikatakda nga mopalit og tulo ka milyon ka metriko tonelada nga bugas humay niining tuiga. Apan ang China mopalit lang og duha ug tunga ka milyon metriko tonelada nga mas ubos sa gilaraw nilang paliton nga tulo punto kinse ka milyon metriko tonelada.

Ang pagbaha sa bugas nga misulod sa Pilipinas gikan sa gawas resulta kini sa Rice Tariffication nga balaud nga giingon sa gobyerno nga tubag sa pagnihit sa bugas ug sa pagmahal sa prisyo niini. Ang Rice Tariffication gisugdan sa pagpatuman sa gobyerno niadtong Marso niining tuiga.

Basi sa gidaghanon sa bugas nga giangkat sa Pilipinas gikan sa gawas maingon nato nga perte gyud diay ta ka dagko ug kakusog mokaon kun ikomparar sa China ug uban nga kanasuran sa tibook kalibotan.

Huna-hunaa gud nga ang Pilipinas aduna lamang 110 milyones nga populasyon kun imong ikomparar sa China nga ang polulasyon 1.4 ka bilyon.

Hinuon basin pud kay maglugaw ra man gud sila dili pariha natong mga Pinoy nga dili mabuhi kun magsigi lang og kaon og nilugaw.

Mao gani seguro ni ang usa sa mga rason nga ang mga insik nadato ug mga dato na misamot ka dato samtang kitang mga Pinoy napobre ug misamot ka pobre.

Makahinumdom lang ko sa istorya nga kinsa tong pobre mao kuno ang mga dagkog kaon. Bisan walay kamatuoran ning maong istorya pero mas maayo pod nga atong pamatud-an nga wala ni kamatuoran.