Inantigo

Sa usa sa mga ebanghelyo dunay naghisgot kalabot niadtong tikasan nga piniyalan nga niwaldas sa katigayonan sa iyang agalon. Sa pagkasayud niya nga papahawaon na siya gumikan saiyang kabuang mihimo gyud dayon siya og mas praktikal nga mga lakang aron kun magkinaunsa dunay mopadayon kaniya sa ilang mga balay kay lagi malisud alang kaniya ang pagkawot og kanal ingon man mauwaw siya nga magpakilimos.

Busa iyang gipangtawag ang tanan nga utangan ug iyang gihimo nga kaltasan ang ilang mga utang. Siguro kita nga ang iyang gikaltas mao lamang ang iyang komisyon nga sa ato pa walay nakuha gikan sa orihinal nga presyo gikan sa iyang agawon. Natural ang mga utangan nagtuo nga usa kini ka dalaygong buhat. Sa laing bahin, nabulahan sab ang agalon tungod kay ang maong kasinatian paagi man pud sa pagkapakaylap sa iyang dungog ingon nga maayo ug manggihatagong tawo. Ang maayong reputasyon niadtong mga panahona ang giisip man nga bahandi alang kanila butang nga anakapadayeg niya sa maong sulugoon nga tikasan.

Sa atong panaw sa kinabuhi kinahanglanon baya gyud nato ang survival ug sa atong pagkab-ot niini kinahanglan nga gamiton gyud nato ang atong panghunahuna nga tarong ug lohikal aron kita mabuhi. Mao tingali nga ang uban kanato imbis magtinarong ang mosagol naman hinuon og minaro sa ilangkaugalingon ug ngadto sa uban aron sila mabuhi. Hinuon wala ko mag-ingon nga kinahanglang magminaro kita aron lamang mabuhi. Wala ko mag-ingon nga atong sundon ang pamaagi sa maong tikasan nga piniyalan aron lamang kita mabulahan.

 Ang hustong pagsabot ning mga butanga mao kining mosunod:

1. Ang tanan baya dili atoa ug duna kitay tulubagon sa tinuod nga tag-iya kun giunsa man nato paggamit ang gisalig  nato. Sa laktod anaa gyud ang husay sa kaulahian.

2. Ikaduha, sa matag kalambuan ato gyud hunahunaon nga dunay laing mga tawo nga di angay biyaan.kinahanglan ang tanan magkuyog gayud alang sa maong kalambuan.

3. Ang mahinungdanon mao, nga sa matag lihok nato ug panlimbasog unta ato kining himoon diha sa natad sa pagkamatinud-anon kay bisan unsaon pa nato og gambalay ang mga nindot ug dalaygong buhat apan sinaglan diay og panlimbong ang tanan walay ayo.