EDITORYAL - Ang lamiang litson sa Cebu

Dili lang kultura, maayong kinaiya sa mga tawo, mga matahom nga lugar, tourist destinations sama sa mga beach resorts misikat ang Sugbo, hasta mga pagkaon niini misikat sab kini ilabi na ang lechon Cebu.

Ang lechon Cebu nahimong generic name sa tanang mga litson basta giluto dinhi sa isla sa Sugbo. Tungod kay aduna kini gitawag og “distinct” nga lasa ug mas lami kini og timpla kun itandi sa tanang mga litson gikan sa ubang mga probinsya sa Pilipinas.

Dinhi sa Sugbo, daghang mga dapit o mga lungsod ang nangangkong mas lami og timpla ilang lechon. Nagtigi sa korona ang Carcar ug Talisay. Apan duna say mga pribadong mga litsonan nga nikulit sab og pangalan sa industriya. Gani ang mga litson gikan sa Sugbo dili lang para sa Cebu kay bisan taga Luzon mogasto gyud og dako para lang makapahatud og litson gikan sa Sugbo.

Kay lahi ra baya gyud ang garbo sa pamilya kun may kombira sa ilaha unya makadalit sila og “lechon Cebu.” Ingon niana kasikat ang litson gikan sa Sugbo nga angay untang magpadayon.

Apan ning bag-ohay lang, daghang mga netizens ang nireklamo pinaagi sa social media kabahin sa ‘minaldito’ nga taras sa mga mamaligyaay og litson diha sa Carcar.

Apan dili lang diay ‘minaldito’ ang problema, na-trigger niini ang ubang netizens nga nakasinati sab og ubang modus sa maong mga vendors, dunay nakapalit og bahaw nga litson nga linaphawan ra og init tubig ug uban pa nga dili maayo. Makapasuko ug makapatagam sa mga mamalitay ug ang nakapait ani pagan sab ang ubang nagnegosyo og litson sa Sugbo bisan dili taga Carcar.

Apan maayo ang gibuhat sa pamunoan ni Mayor Mercedita Pura nga giseryuso kining mga reklamo kay tinuod nga gipakauwawan nila ang siyudad ug gipasidan-an sila nga “sila ray nagpatay sa ilang kaugalingong negosyo” tungod sa ilang gibuhat.

Ang Carcar nisikat kaniadto tungod sa ampaw, sapatos, chicharon, bucarillo, apan pagkatinuod hasta ang litson nila lami kaayo itandi sa uban apan uwahi lang kaayong gibaniog apan nisikat gihapon.