Sa kalagot niya

Matag usa nato buot mangita og seguridad, ug bisan unsa nga paagi nga makadaut sa  atong seguridad bation gyud nato ang atong kalagot ug kaligutgot kay dili kita buot matay-og sa atong naandang nahimutangan.

Sa laktod buot natong magpabiling lig-on diha sa atong nahimutangan ang bisan unsang hulga dili gyud angay palabyon nga dili matapin-an o dili ba kaha masulbad.

Ingon ini usab ang relasyon. Dunay mga tawo nga nahimong babag sa atong gipangandoy nga kalinaw. Sa laktod anaa gyud ang insecurity bisan unsaon. Sa laing bahin, ang maong pagbati diay nagasukad sa immature nga panlantaw sa kinabuhi.

Hinuon gumikan tingali sa dili lig-on ang emosyonal nga pagtubo, ang tawo mamahimong insecure gyud tungod kay una sa tanan wa siya’y salig sa iyang kaugalingon.

Si bisan kinsa nga way salig sa iyang kaugalingon ang mamahimong way salig usab sa uban. Ang maong kaway pagsalig maoy makahaling og mga pagbati nga dili maayo ug kasagaran agresibo. Mao nga dili nato tuyoon bation gyud nato ang kalagot.

Apan dunay mga tawo nga makahatag gyud og kalagot sa ilang isigkaingon. Mga tawo nga naghinobra ang bilib sa kaugaingon.

Mga tawo nga nagpunay lang og pasiatab kutob ra sulti apan way buhat. Mga tawo nga malupigon sa uban ug labaw sa tanan, mga tawong hilabtanon.

Dunay kaila nako nga nagkanayon: “Itom na lagi kaayo ka?” Ako siyang gitubag: “Kakita naka ngutana pa gyud ka?” Unsay punto sa maong komentaryo aron lamang madungog sa mga tawo ug ma appreciate nila ang imong kaputi bisan pa man kun sayud ka nga sa dihang gipangala ka sa butong naapil pud ang palwa?”

Ang suliran mosulod labina kun atong itandi ang atong kaugalingon ngadto sa uban. Dili maayo nga atong itandi ang atong kaugalingon ngadto sa uban kay ning paagiha nahimong mas maumol ug mahimugso ang pag-indigay. Butang nga dili gyud tawon makatabang diha sa atong kalambuan.

Tinuod makalagot apan dili pud nato pasagdan ang maong kahimtang ug pagbati nga maoy moguba sa maanindot nga adlaw nga angayan natong tagmtamon gumikan lang sa mga panghitabo ug mga tawo nga nakapalagot kanato.